Kolýmbııadaǵy joıqyn jer silkinisinen keıin kofe eksporty toqtatyldy
ASTANA. KAZINFORM- Kolýmbııadaǵy joıqyn jer silkinisi eldiń negizgi portyndaǵy jumysqa kedergi keltirip, mańyzdy avtojoldardyń jabylýyna sebep boldy. Sonyń saldarynan kofe eksporty aıtarlyqtaı toqtap qaldy, dep habarlaıdy Bloomberg.
Asoexport kofe eksporttaýshylar qaýymdastyǵynyń basshysy Gýstavo Gomestiń aıtýynsha, eldegi kofe eksporty boıynsha eń iri Býenaventýra portyna qatynaý qıyndaǵan.
Kalı – Býenaventýra tasjolynyń birneshe bóligi, sonyń ishinde tonnelder ornalasqan ýchaskeler jabyldy.
Bul jol Kolýmbııanyń Tynyq muhıty jaǵalaýyna shyǵatyn negizgi kólik baǵyttarynyń biri sanalady.
-Qazir kofe operatsııalary toqtatyldy. Jekelegen jumystar júrgizilýi múmkin, alaıda kofe eksporty toqtap tur. Joldyń qashan tolyq ashylatyny týraly ázirge resmı aqparat joq, – dedi Gýstavo Gomes.
Port termınaldarynyń basshylyǵy jer silkinisinen kelgen zalaldy baǵalap jatyr.
Kofe tıelgen júkterdi qabyldaý ýaqytsha toqtatyldy nemese shekteldi.
Kolýmbııanyń Karıb teńizi jaǵalaýyndaǵy Kartahena men Santa-Marta porttarynda aıtarlyqtaı irkilis tirkelmegen.
Alaıda kofe júkterin eldiń soltústigine baǵyttaý qıynǵa soǵyp otyr. Buǵan júk kólikteriniń tapshylyǵy sebep.
Jer silkinisinen zardap shekken aımaqqa jaqyn kofe óndiretin óńirlerde kólik kompanııalary men kofe óńdeý kásiporyndarynyń edáýir bóligi ornalasqan.
Tabıǵı apat olardyń jumysyna da keri áser etti.
Nıý-Iork bırjasynda arabıka kofesine arnalǵan fıýcherster birneshe aptadaǵy eń joǵary deńgeıge jetkennen keıin sál tómendedi.
Naryq qatysýshylary jer silkinisiniń kofe jetkizilimi men logıstıkaǵa yqtımal áserin baǵalap jatyr.
Kolýmbııa – álemdegi arabıka kofesin óndiretin ekinshi iri el.
2025 jyly Kolýmbııada 60 kelilik 13,4 mln qap kofe óndirildi.
Jaǵdaıdyń kúrdelenýine qazir egin jınaý naýqanynyń júrip jatqany da áser etip otyr.
Qazirgi ýaqytta kofe jınaý jumystary negizinen eldiń ońtústigindegi Kaýka, Narıno, Vale-del-Kaýka jáne Ýıla óńirlerinde júrgizilý ústinde.
Bul aımaqtarda óndirilgen kofeniń edáýir bóligi ádette Býenaventýra porty arqyly eksporttalady.
Gýstavo Gomestiń aıtýynsha, kofe óńdeıtin kásiporyndar jer silkinisiniń saldaryn áli de baǵalap jatyr.
Kásiporyndardyń óndiristik nysandaryna eleýli zaqym kelgeni týraly ázirge aqparat túsken joq.
Alaıda elektr energııasy men baılanys júıelerindegi irkilister kásiporyndardyń jumysyna áser etýde.
Tabıǵı apat saldarynan keıbir qyzmetkerler baspanasynan aıyrylǵan.
Joldar men kásiporyndardyń jumysy qalpyna kelgennen keıin de kofe eksporty qosymsha kidiriske ushyraýy múmkin.
Jınalyp qalǵan kofe kóleminiń bir ýaqytta porttarǵa jóneltilýi kólik ınfraqurylymyna túsetin salmaqty arttyryp, kepteliske ákelýi yqtımal.
Kolýmbııa aı saıyn 60 kelilik shamamen 1 mln qap kofe eksporttaıdy.
Sondyqtan eksporttaǵy árbir kúndik úzilis aıtarlyqtaı kólemdegi kofe jetkiziliminiń keshigýine ákelýi múmkin.
Buǵan deıin Kolýmbııadaǵy joıqyn jer silkinisinen qaza tapqandar sany 250 adamnan asqany habarlanǵan bolatyn.
