Kolýmbııadaǵy jer silkinisinen mert bolǵandar sany 160-tan asty
ASTANA.KAZINFORM - Kolýmbııadaǵy qutqarý jumystary ekinshi kúnge ulasty. Sońǵy málimetterge súıensek, eldegi sońǵy onjyldyqta alǵash ret tirkelgen qýatty jer silkinisinen qaza bolǵandar sany 164-ke jetti, dep habarlaıdy Reuters.
Qurbandar sany odan ári artýy múmkin. Polıtsııa, áskerı qyzmetshiler jáne eriktilerdiń qatysýymen qutqarý brıgadalary túni boıy izdeý-qutqarý jumystaryn júrgizdi.
10 tamyz kúni jergilikti ýaqyt boıynsha tańǵy saǵat 7:34-te Kolýmbııanyń batysynda 7,4 baldyq jer silkinisi tirkeldi.
Saldarynan Pereıra jáne Kalı qalalarynda kóp qabatty ǵımarattar qırap, Manısales qalasyndaǵy tarıhı shireýdiń munarasy opyryldy.
Shamamen 2,2 mıllıon adam turatyn Kalıde on shaqty ǵımarat tolyǵymen qırady, bul turǵyndardy úılerin tastap ketýge májbúr etti.
Qalalyq aýrýhananyń birneshe joǵarǵy qabaty qulady, onyń bir bóliginde balalar bólimi ornalasqan. Keıbir naýqastar úıindi astynda qaldy. Taǵy 600 adam medıtsınalyq kómekke júgindi.
Pereırada turǵyn úıler tutas beton úıindilerge aınaldy.
Birneshe kún buryn ǵana qyzmetke kirisken Kolýmbııa prezıdenti Abelardo de la Esprıelıa jer silkinisiniń saldaryn joıý jumystaryn óz baqylaýyna alatynyn málimdedi.
-Kolýmbııa halqy úshin qıyn-qystaý kezeńde qoldan kelgenniń bárin jasaımyz, - dedi ol.
Kolýmbııadaǵy jer silkinisi 6 myńnan astam adamnyń ómirin qıǵan eki birdeı joıqyn jer silkinisinen keıin áli qalpyna kele qoımaǵan kórshiles Venesýelada da sezildi.
Aıta keteıik, búgin Qasym-Jomart Toqaev Kolýmbııadaǵy joıqyn jer silkinisi saldarynan kóptegen adamnyń qaza bolýyna baılanysty Qazaqstan halqynyń jáne óziniń atynan Prezıdent Abelardo de la Esprıelıaǵa jáne onyń otandastaryna kóńil aıtty.
