Kolýmbııadaǵy jer silkinisinen qaza tapqandar sany 220-dan asty
ASTANA. KAZINFORM — Kolýmbııadaǵy 7,4 magnıtýdaly jer silkinisinen qaza tapqandar sany 224-ke jetti. Eldiń eń qatty zardap shekken aýdandarynda izdeý-qutqarý jumystary áli de júrgizilip jatyr, dep habarlaıdy Reuters.
Jergilikti bılik organdarynyń málimetinshe, eń kóp qurbandar Kalıde tirkeldi — 95 adam. Pereırada — 72, Vale-del-Kaýka departamentinde — 38 adam jáne Chokoda — 13 adam qaza tapty.
Qutqarýshylar, polıtsııa, áskerı qyzmetkerler jáne eriktiler úıindilerdi tazalap, tiri qalǵandardy izdeýdi jalǵastyryp jatyr. Bılik qaza tapqandar sany áli de artýy múmkin ekenin eskertti.
Jer silkinisi 10 tamyz kúni Kolýmbııanyń batys aımaǵynda tirkeldi. Kolýmbııa geologııalyq qyzmetiniń málimeti boıynsha, jer silkinisiniń magnıtýdasy — 7,4. Epıtsentri Choko departamentindegi San-Hose-del-Palmar mýnıtsıpalıtetinde ornalasqan.
Jer silkinisi Kalı, Pereıra jáne Manızales sııaqty birneshe qaladaǵy ǵımarattardyń opyrylýyna ákeldi.
Buǵan deıin Kolýmbııadaǵy qýatty jer silkinisinen qaza tapqandar sany 160 adamnan asqan bolatyn.
Birneshe kún buryn ǵana qyzmetke kirisken Kolýmbııa prezıdenti Abelardo de la Esprıelıa jer silkinisine qarsy úkimettiń is-qımylyn jeke ózi basqaratynyn málimdedi.
Jer silkinisi kórshiles Venesýelada da sezildi.
