Kolýmbııadaǵy jer silkinisinen 321 adam qaza tapty
ASTANA. KAZINFORM — 10 tamyzda Kolýmbııada bolǵan magnıtýdasy 7,4 jer silkinisinen qaza tapqandar sany 321 adamǵa jetti. Taǵy 4 595 adam jaraqat alyp, 257 adam habar-osharsyz ketken. Bul týraly Kazinform agenttigi Sınhýaǵa silteme jasap habarlaıdy.
Tabıǵı apattar qaýpin basqarý jónindegi ulttyq basqarmanyń (UNGRD) málimetinshe, 364 adam qutqarylǵan. Tabıǵı apattan 15 departamentke qarasty 476 mýnıtsıpalıtette jalpy 284 185 adam men 1 236 janýar zardap shekken.
Jer silkinisinen ınfraqurylymǵa da aıtarlyqtaı zııan kelgen. 467 ǵımarat qırap, 163 884 turǵyn úı zaqymdanǵan, taǵy 31 445 úı qıraǵan.
Sonymen qatar 4 611 qoǵamdyq nysanǵa, 3 579 bilim berý mekemesine, 351 medıtsınalyq ortalyqqa, 435 jol jáne 111 sý qubyryna zaqym keldi. Sondaı-aq 69 avtokólik kópiri men 14 jaıaý júrginshiler kópiri, bes áýejaı zaqymdanǵan.
Eske salaıyq, buǵan deıin belgili ánshi Shakıra Kolýmbııada 10 tamyzda bolǵan joıqyn jer silkinisi kezinde eń qatty zardap shekken aımaqtardyń biri - Choko departamentine barǵanyn jazǵanbyz.
Óńirge barǵan saparynda kolýmbııalyq ánshi 10 mektepti qaıta qalpyna keltirip, qatty búlingen tehnologııalyq ýnıversıtetke kómek kórsetkisi keletinin málimdegen.
Al onyń aldynda Kolýmbııadaǵy jer silkinisinen 304 adam qaza taýyp, taǵy 426 adam habar-osharsyz ketkenin habarlaǵanbyz.
Aıta keteıik, magnıtýdasy 7,4 baldyq jer silkinisi 10 tamyzda Kolýmbııanyń batysyndaǵy Choko departamentinde ornalasqan San-Hose-del-Palmar qalasynyń mańynda boldy.
