Kolýmbııadaǵy venesýelalyq mıgranttar qýanyshtan Bogatada merekelik sherýge shyqty

ASTANA. KAZINFORM — Búgin Kolýmbııanyń astanasy Bogotanyń ortalyǵynda AQSh-ty qoldaý maqsatynda beıbit sherý ótti. Shara merekelik kóńil kúıde uıymdastyryldy.

Venesýelamen shekaralas ornalasqan Kolýmbııa astanasynda aktsııaǵa qatysýshylardyń keıbiri Venesýela jalaýlaryn jelbiretip, keıbiri ony ıyǵyna jamylyp shyqty.

«Kolýmbııalyqtar retinde biz kórshilerimiz úshin qatty qýanyshtymyz, sebebi bul sát olardyń bostandyǵyn jáne tarıhyndaǵy mańyzdy kezeńdi bildiredi. Bul — uly oqıǵa, bul biz úshin de, Venesýeladaǵy kórshilerimiz úshin de zor qýanysh. Biz buǵan shyn júrekten qýanamyz», dedi qatysýshylardyń biri Danıella.

Mıtıngke qatysqan taǵy bir áıel 18 jasynda Kolýmbııaǵa kóship kelgen eken. Ol osynda segiz jyldan beri turyp kele jatyr. Venesýelalyq mıgrant ıspan tilinde sóılep, oǵan bul jańalyqty qurbysy telefon arqyly habarlaǵanyn aıtty.

Onyń aıtýynsha, ol alǵashynda qatty úreılenip, týystarymen sóılesip, aqparattyń ras ekenine kóz jetkizgenge deıin bolǵan jaǵdaıǵa senbegen.

Onyń sózinshe, venesýelalyqtar sońǵy 20 jyl boıy óz eliniń resýrstary men taǵdyryn baqylaý múmkindiginen aıyrylǵan.

«Bizdi uzaq jyldar boıy tonap keldi. Egemendigimiz bar bolǵanymen, ony qorǵaıtyn eshteńemiz joq», dedi ol.

Sondaı-aq ol AQSh prezıdentine alǵysyn bildirdi.

«Qalaı desek te, men Tramp óz ýádesin — birtutas Amerıkany qurýdy oryndady dep esepteımin. Sebebi Amerıka — tek Qurama Shtattar ǵana emes, tutas bir qurlyq», dep túıindedi ol.

Aıta keteıik, Venesýela prezıdenti jubaıymen birge ustalyp, elden evakýatsııalanǵanyn jazdyq.

Al keıinirek AQSh prezıdenti Donald Tramp Venesýela prezıdenti men onyń áıeli kememen Nıý-Iorkke jetkiziletinin málimdedi.

NBC telearnasy Madýro men onyń jubaıy ushaqpen Nıý-Iork shtatyna jetkizilgenin tikeleı efırde kórsetti.