Kolýmbııadaǵy ushaq apatynan qaza bolǵandar sany 66-ǵa jetti
ASTANA. KAZINFORM - Kolýmbııanyń ońtústigindegi Pýtýmaıo departamentinde áskerı-transporttyq Hercules C-130 ushaǵynyń apatqa ushyraýy saldarynan qaza tapqandar sany 66-ǵa jetti, taǵy 57 adam jaraqat aldy, dep habarlaıdy TASS agenttigi.
Pýtýmaıo departamentinde bolǵan apattan 66 adam qaza tapqany týraly derekti TASS áskerı derekkózderge súıene otyryp keltiredi.
Buǵan deıin 34 adamnyń qaza tapqany habarlanǵan edi. Qutqarýshylardyń málimetinshe, ushaq bortynda barlyǵy 128 adam bolǵan. Olardyń 57-si aýrýhanaǵa jetkizilgen, bir jolaýshy zardap shekpegen. Taǵy tórt adamnyń máıiti ázirge tabylǵan joq.
Kolýmbııa áskerı-áýe kúshteriniń qolbasshysy, general Karlos Sılva Rýeda telearnaǵa bergen suhbatynda apat ornyna qosymsha medıtsınalyq tikushaq pen qutqarýshylar toby jiberilgenin málimdedi. Sondaı-aq oqıǵa ornyna ushaqtyń qulaý sebepterin anyqtaıtyn tergeý toby attanǵan.
Hercules C-130 ushaǵy Kolýmbııanyń ońtústigindegi Pýerto-Legısamo mýnıtsıpalıtetinde ushyp shyqqannan keıin kóp uzamaı apatqa ushyraǵan. Caracol telearnasy kórsetken beınejazbalarda ushaqtyń bıiktikke tolyq kóterilmeı jatyp qulaı bastaǵany baıqalady.
Osyǵan deıin Kolýmbııada 100-den astam áskerı qyzmetshi mingen ushaq apatqa ushyraǵany týraly jazdyq.