Kolýmbııada jer silkinisinen kóz jumǵandar sany 300-den asty
ASTANA. KAZINFORM — Kolýmbııadaǵy jer silkinisinen 304 adam qaza taýyp, taǵy 426 adam habar-osharsyz ketti. Bul týraly eldegi tabıǵı apattar qaýpin basqarý qyzmeti málimdedi, dep habarlaıdy TASS.
Vedomstvonyń X áleýmettik jelisindegi paraqshasynda jarııalanǵan málimetke sáıkes, 4548 adam jaralanǵan, 426 adam habar-osharsyz ketken, 356 adam qutqarylǵan.
Bıliktiń sońǵy baǵalaýynsha, jer silkinisi saldarynan 29 554 úı qırap, 134 342 ǵımarat zaqymdanǵan.
Buǵan deıin 281 adamnyń qaza tapqany habarlanǵan edi.
Tabıǵı apattan kelgen materıaldyq shyǵyn 30 trln pesoǵa (9,6 mlrd dollar) baǵalanyp otyr. Bul týraly Kolýmbııa prezıdenti Abelardo de la Esprıelıa málimdedi.
Prezıdenttiń aıtýynsha, alǵashqy tehnıkalyq baǵalaý boıynsha Choko, Vale-del-Kaýka, Rısaralda, Kındıo jáne Kaldas departamentterindegi materıaldyq shyǵyn shamamen 30 trln pesony quraıdy. Onyń ishinde 24,5 trln peso ǵımarattarǵa, 5,5 trln peso ınfraqurylymǵa tıesili.
Esprıelıa absolıýttik kórsetkish boıynsha Choko departamentindegi shyǵyn basqa óńirlermen salystyrǵanda az bolǵanymen, zilzalanyń salystyrmaly áseri dál osy óńirde eń joǵary ekenin atap ótti.
Aıta keteıik, magnıtýdasy 7,4 baldyq jer silkinisi 10 tamyzda Kolýmbııanyń batysyndaǵy Choko departamentinde ornalasqan San-Hose-del-Palmar qalasynyń mańynda boldy.
