Kolýmbııada jer silkinisinen keıin fýtbol chempıonaty toqtatyldy
ASTANA. KAZINFORM — Kolýmbııanyń batysynda bolǵan jer silkinisinen keıin eldegi fýtbol chempıonaty ýaqytsha toqtatyldy, dep habarlaıdy Report.
Chempıonat basshylyǵynyń sheshimimen osy aptaǵa josparlanǵan barlyq týrnır sharalary toqtatyldy. Mundaı sheshim jer silkinisinen zardap shekkenderge qoldaý kórsetý maqsatynda qabyldanǵan. Joǵary jáne ekinshi dıvızıondaǵy barlyq 36 klýb zardap shekken aýdandarǵa kómek kórsetý jáne olardy qalpyna keltirý jumystaryna kúsh jumyldyrady.
— Búgin fýtbol kúte turady, Kolýmbııaǵa bizdiń kómegimiz qajet, — delingen málimdemede.
Buǵan deıin Kolýmbııa geologııalyq qyzmeti Choko departamentindegi San-Hose-del-Palmar qalasynyń mańynda magnıtýdasy 7,4 bolatyn jer silkinisi bolǵanyn habarlaǵan edi.
Kolýmbııa prezıdenti Abelardo de la Esprıelıanyń aıtýynsha, qaza tapqandar sany 111 adamǵa jetken. Eń kóp zardap Pereıra men Manısales qalalarynda tirkeldi.
Jer silkinisiniń dúmpýleri kórshiles elderde, sonyń ishinde Panamada da sezilgen.
Buǵan deıin Japonııanyń Honsıý aralynyń jaǵalaýynda 5,4 baldyq jer silkinisi boldy.
