Kolýmbııada jeńiske jetken jańaózendik boksshyǵa jerlesteri qurmet kórsetti
AQTAÝ. KAZINFORM — Aqpan aıynyń orta sheninde Kolýmbııada ótkizgen debıýttik jekpe-jekte jeńiske jetken jańaózendik Nurym Dilshat UBC Intercontinental champion tıtýlyn ıelendi. Ońtústik Amerıkadan týǵan jerine oralǵan boksshyǵa jerlesteri qurmet kórsetip, qala ákimi qabyldady.
Kásipqoı boksqa endi qadam basqan mańǵystaýlyq Nurym Dilshat Kolýmbııada ótken boks keshinde qarsylasyn nokaýtqa jibergen bolatyn. Bul syn jas boksshy alys sheteldegi alǵashqy syn bolyp otyr. Sonymen birge, Ózbekstan men Ázirbaıjanda jekpe-jek ótkizip, jeńisti jolyn nyqtaı túsken.
Jańaózen ákimi kásipqoı boksshymen kezdesýde munaıshylar qalasynyń sport salasyndaǵy jetistigi taǵy bir júldemen tolyqqanyn atap ótti. Sonymen qatar, jastar arasynda buqaralyq sportty nasıhattap, balalardy sportqa baýlý baǵytynda birigip jumys isteýdi usynyp otyr.
«Álemdik deńgeıde oblysymyzdyń jáne qalamyzdyń abyroıyn asqaqtatqany úshin shynaıy alǵysyn aıtamyn. Al budan da joǵary jetistikterge jete berýine tilektespin», — dedi qala ákimi kezdesýde.
Sońǵy eki aıda jańaózendik kásipqoı boksshy Dilshat Nurym úsh kezdesý ótkizip, onyń barlyǵynda basym túsip otyr. Ol alǵashqy kezdesýin 25 jeltoqsanda Bakýde bastady. Sol synda birinshi jartylaı salmaqta alty raýndqa eseptelgen kezdesýinde jergilikti boksshy Agadjan Dargahovty ekinshi raýndta tehnıkalyq nokaýtpen utty.
Aqpan aıynyń basynda Kolýmbııanyń Santa-Marte qalasynda jergilikti boksshy Over Paternınıamen judyryqtasyp, kezekti jeńisine qol jetkizdi. Osylaısha eki reıtıngtik kezdesýdi sátti aıaqtaǵan jerlesimiz chempıondyq belbeý úshin judyryqtasýǵa múmkindik aldy. Aqpan aıynyń 12 kúni kolýmbııalyq bylǵary qolǵap sheberi Kevın Martınezpen sharshy alańda jolyǵyp, qarsylasyn nokaýtpen jeńgen jańaózendik kásipqoı boksshy «UBC INTERCONTINENTAL CHAMPION» beldigin ıelendi. Qazirgi ýaqytta kásipqoı boksshy Nurym Dilshat álemdik reıtıngte 174 orynda tur.
