Kolýmbııada ushaq apatynan 69 adam qaıtys bolǵannan keıin aza tutý kúni jarııalandy
ASTANA. KAZINFORM – Kolýmbııada eldiń ońtústiginde áskerı-kólik ushaǵy apatynan 69 adam qaza tapqannan keıin úsh kúndik ulttyq aza tutý kúni jarııalandy, dep habarlaıdy Anadolu.
Kolýmbııa prezıdenti Gýstavo Petro h áleýmettik jelisinde ushaq apatynan qaza tapqan áskerı qyzmetshilerdiń otbasylaryna kóńil aıtyp, eldiń qatty qaıǵyryp jatqanyn atap ótti.
— 23 naýryzda Pýtýmaıo departamentiniń Pýerto-Legýısamo aýdanynda bolǵan ushaq apatynan qaza tapqan Qurlyq áskerleriniń, Áýe-ǵarysh kúshteriniń jáne Ulttyq polıtsııanyń 69 áskerı qyzmetshisin eske alý maqsatynda Men búkil el boıynsha úsh kúndik ulttyq aza tutý týraly jarııalaımyn, - delingen jarııalanymda.
Ol osy kezeńde barlyq memlekettik mekemede, áskerı garnızondarda, polıtsııa bólimshelerinde jáne búkil álemdegi Kolýmbııanyń barlyq elshiliginde tý túsiriletinin atap ótti.
Sondaı-aq Prezıdent qaza tapqandardy eske alý úshin áskerılerdiń qatysýymen rásim josparlanǵanyn aıtty.
Hercules C-130 Kolýmbııanyń ońtústigindegi Pýerto-Legısamo mýnıtsıpalıtetinde kóterilgennen keıin kóp uzamaı apatqa ushyrady. Caracol telearnasy efırde kórsetken beıne kadrlarda ushaqtyń bıiktikke jetpeı qulaı bastaǵanyn kórýge bolady. Jergilikti qutqarýshylardyń aıtýynsha, bortta barlyǵy 128 adam bolǵan.
Dúısenbi kúni Kolýmbııanyń ońtústigindegi Pýtýmaıo aımaǵynda áskerı ushaq apatqa ushyraǵanyn jazǵan bolatynbyz. Bul týraly seısenbi kúni Pýerto-Legısamo qalasynyń meri Lýıs Emılıo Býstos habarlady.
