Kolýmbııada sý tasqyny saldarynan 50 myńǵa jýyq otbasy úılerin tastap ketti

ASTANA. KAZINFORM — Kolýmbııada 14 adam qaza taýyp, 50 myńǵa jýyq otbasy úılerin tastap ketti. Eldiń soltústigi sý astynda qaldy. El prezıdenti apattyń aýqymyn baǵalady. Gýstavo Petro sý tasqynynan zardap shekken aýdandardyń ústinen ushyp ótti, dep habarlaıdy BELTA.

Tolassyz jaýǵan jańbyr sý tasqynyna túrtki boldy. Sıný ózeni arnasynan asyp, úsh ondaǵan mýnıtsıpalıtetterge zaqym keltirdi. Tabıǵı apattyń ortasynda 150 myńnan astam adam qaldy. Adamdardyń aıtýynsha, kele jatqan qaýip týraly der kezinde eskertpeý adam shyǵynyna, ǵımarattardyń qıraýyna jáne dúnıe-múliktiń joǵalýyna ushyratty.

— Men bárinen aıyryldym. Barlyq zattarymdy saqtaı almadym. Sý deńgeıi bir metrden eki metrge deıin tez kóterildi. Endi ne isterimdi bilmeımin, — dep bólisti jergilikti turǵyn.

Oqıǵa ornynda qutqarýshylar jumys istep, adamdarǵa da, janýarlarǵa da kómektesip jatyr. Sý basqan úılerden ıtter men mysyqtar shyǵaryldy. Bılik shamamen 11 tonna azyq-túlik pen veterınarlyq zattardy jiberýge ýáde berdi.

Buǵan deıin Madagaskardyń shyǵys jaǵalaýyn joıqyn tropıkalyq tsıklon soqqan bolatyn. Onyń saldarynan qatty jańbyr jaýyp, kóshkin júrip, ekpindi jel sekýndyna 70 metrge jetti. Eldiń basty porty Týamasına eń kóp zardap shekti. Qalanyń birneshe bloktary qıratyldy. Kóptegen ǵımarattar shatyrlarynan aıyryldy, al turaqtylyǵy tómen turǵyn úıler tolyǵymen derlik qırady. Kóshelerde tamyrymen qoparylǵan aǵashtar, synǵan qurylystar, aýdarylǵan kólikter men mototsıklder shashylyp jatty. 900 úıden turatyn bir blokta birnesheý ǵana turdy. Adamdar ýaqytsha ornalastyrý ortalyqtarynan da baspana taba almaı qınaldy. Turǵyndar aıtarlyqtaı shyǵynǵa ushyrady. Qutqarýshylar tabıǵı apattyń saldaryn joıý úshin kúresip jatyr. Madagaskar halqy tsıklonnyń jaqyndaǵany týraly aldyn ala eskertildi. Mektepterde sabaq ýaqytsha toqtatyldy. Ulttyq áýe kompanııasy barlyq reısterdi toqtatty.

Eske sala keteıik, Marokkodaǵy sý tasqyny bılikti 108 000-nan asa adamdy evakýatsııalaýǵa májbúr etti.