Kolýmbııada kóshkin júrip, 12 adam qaza tapty
BOGOTA. QazAqparat – Kolýmbııanyń ortalyq bóligindegi taýly aýdanda nóser jaýyn saldarynan kóshkin júrip, 12 adam qaıtys boldy, birneshe úı qırady, dep habarlady eldiń azamattyq qorǵanys agenttigi.
Kóshkin Kýndınamarka provıntsısyndaǵy Kvetamede bolyp, jolyndaǵynyń bárin jaıpap ketken, dep habarlaıdy QazAqparat Reuters agenttigine silteme jasap.
Qazirgi ýaqytta 12 adamnyń máıiti tabyldy, olardyń ishinde 2 bala bar.
Azamattyq qorǵanys, Qyzyl krest qutqarýshylary, órt sóndirýshiler men áskerıler tonnalaǵan batpaq pen úıindi arasynan iz-túzsiz joǵalǵandardy izdep jatyr.
Kóshkin el astanasy Bogota men mańyzdy aýylsharýashylyq aımaǵy sanalatyn Meta provıntsııasynyń astanasy Vılıavısensıony jalǵaǵan tasjoldy jaýyp qaldy.
Kolýmbııanyń taýly aımaǵynda nóser jańbyr jıi jaýatyndyqtan kóshkin qalypty qubylys sanalady.
2017 jyly Pýtýmaıo provıntsııasyndaǵy Mokoa qalasynda bolǵan keıingi iri kóshkin saldarynan 320-dan astam adam qaza tapqan bolatyn.
