Kolýmbııada koka ósiretin sharýa qojalyqtary joıylmaq
ASTANA. QazAqparat - Kolýmbııa bıligi jergilikti fermerlermen koka egistigi alqaptaryn kelisip otyryp joıýdy kózdep otyr, dep jazady «Habar 24».
Jobany úkimet pen bılikke qarsy kúresip kelgen Kolýmbııanyń qarýly revolıýtsııalyq kúshteri birlesip jasaǵan. Oǵan sáıkes sharýa kokaın esirtkisin alatyn ósimdik alqabynan óz erkimen bas tartatyn bolsa, aı saıyn 350 dollar beriledi.
Sondaı-aq sharýalarǵa nesıeleý men sýbsıdııalaý da qarastyrylǵan. Tipti eski kásibin tastaýǵa keliskenderge jemis-jıdek pen kakao ósirýdi úıretip, tehnıkalyq kómek kórsetedi. Bul úshin memleket qazynadan 340 mıllıon dollar bólip, baǵdarlama aıasynda 50 myń otbasyn qamtýdy kózdeıdi.
«Árıne, úkimette koka ósiretin sharýa qojalyqtaryn kúshtep joıý jaǵy da qarastyrylǵan. Biraq mundaı árekettiń qazir usynyp otyrǵan jobaǵa qaraǵanda shyǵyny mol. Sondyqtan fermerlermen bul máseleni aqyldasyp sheshý ekonomıkalyq jaǵynan áldeqaıda tıimdi», - deıdi Kolýmbııanyń «FARK» uıymymen beıbit kelisim jónindegi joǵarǵy komıssary Rafael Pardo.
