Kolýmbııada qarýly qaqtyǵysta 80 adam qaza tapty

BOGOTA. KAZINFORM – Norte-de-Santander departamentinde Ulttyq azat etý armııasy (ELN) men Kolýmbııanyń revolıýtsııalyq qarýly kúshteriniń (FARC) burynǵy músheleri arasyndaǵy shaıqasta 80 adam qaza tapty, dep habarlady Anadoly.

Norte-de-Santander gýbernatory Ýılıam Vılıamızar jýrnalısterge jaǵdaıdyń óte qaıǵyly kúıde ekenin málimdegen.

– 80-nen astam qaza taýyp, 20-dan astam adam jaralandy. Qaqtyǵys bolǵan jerde beıbit turǵyndar da boldy, – dedi ol.

Gýbernator tez arada gýmanıtarlyq dáliz qurýǵa jáne áýeden qoldaý kórsetýge shaqyrǵan. Sebebi, turǵyndar óz úılerinde qamalyp otyr. Eldi mekender arasynda jappaı kóshý áreketi bastalǵan.

Vılıamızardyń aıtýynsha, 10 myńnan astam adam úılerin tastap ketýge májbúr bolǵan. Kóptegen otbasylar, sonyń ishinde balalar men jastar, kez kelgen múmkindikti paıdalanyp, qaqtyǵys aımaǵynan qashyp jatyr.

Qaýipsizdikke baılanysty 20 qańtardan bastap Katatýmbo aımaǵyndaǵy barlyq mektepter jabylady.

Prezıdent Gýstavo Petr qaqtyǵys aımaǵyna baryp, jergilikti sheneýniktermen jáne joǵary laýazymdy áskerı sheneýniktermen kezdesti. Ol áskerlerge jedel túrde qoǵamdyq qaýipsizdikti qalpyna keltirýdi tapsyrdy.

ELN men FARC-tyń burynǵy músheleri arasyndaǵy qaqtyǵys 16 qańtarda kokaın plantatsııalary men esirtki kontrabandasynyń joldaryn baqylaýǵa baılanysty bastalǵan.

Aıta keteıik, Kolýmbııa bıligi ondaǵan basqa eldermen birlese otyryp, alty apta ishinde 225 tonna kokaın tárkilegen bolatyn, bul esirtkige qarsy operatsııalar arasynda álemdik rekord boldy.