Kolýmbııada dron tikushaqty atyp túsirdi: 12 adam qaza tapty, 5 adam jaraqat aldy

BІShKEK. KAZINFORM — Kolýmbııada pılotsyz ushý apparatynyń shabýyly saldarynan polıtsııa tikushaǵy qulap, ishinde bolǵan 17 quqyq qorǵaýshynyń arasynda 12 adam qaza taýyp, 5 adam jaraqat alǵan, dep habarlaıdy Anadoly. 

Oqıǵa Antıokııa departamentiniń Amalfı mýnıtsıpalıtetiniń aýyldyq aımaǵynda bolǵan.

Aldyn ala málimetterge sáıkes, apat saldarynan 12 polıtseı qaza taýyp, taǵy beseýi jaraqat aldy. Oqıǵa ornynda izdestirý-qutqarý jumystary jalǵasyp jatyr.

Antıokııa gýbernatory Andres Hýlıan Rendonnyń aıtýynsha, qaza tapqan tikushaq koka egistikterin qolmen joıýmen aınalysqan qyzmetkerlerdiń qaýipsizdigin qamtamasyz etip júrgen. Onyń sózinshe, shabýyl pılotsyz ushý apparatyn qoldaný arqyly jasalǵan.

Bılik bul shabýylǵa burynǵy «Kolýmbııanyń qarýly revolıýtsııalyq kúshteri» (FARC) uıymymen baılanysy bar Estado Mayor Central (EMS) tobynyń 36-frontyn jaýapty dep otyr.

Aımaqtaǵy qaýipsizdik kúshteri oqıǵanyń mán-jaıyn anyqtaý jáne kinálilerdi ustaý operatsııasyn jalǵastyryp jatyr.

Aıta ketelik Kolýmbııada jańa týǵan qyz balaǵa ChatGPT esimi berilgen edi.