Kolýmbııada bomba jarylyp, eki adam qaza taýyp, 24 adam jaraqattandy
ASTANA. KAZINFORM – Kolýmbııanyń qorǵanys mınıstri Pedro Sanches Sýares áleýmettik jelide shabýyldy FARC-pen baılanysy bar oppozıtsııalyq toptar jasaǵanyn málimdedi. Bul týraly Anadoly habarlady.
Kolýmbııanyń ońtústiginde ornalasqan polıtsııa bólimshesinde bolǵan bomba jarylysy saldarynan eki adam qaza taýyp, 24 adam jaraqat aldy.
Bılik ókilderiniń habarlaýynsha, jarylys Ýıla ákimshilik aımaǵyndaǵy La-Plata qalasynda bolǵan. Polıtsııa bólimshesiniń aldyna qoıylǵan mototsıklge ornatylǵan qoldan jasalǵan jarylǵysh zat iske qosylǵan.
Oqıǵadan keıin aımaqqa áskerı kúshter jiberildi.
Kolýmbııanyń qorǵanys mınıstri Pedro Sanches Sýares áleýmettik jelidegi paraqshasynda bul shabýyldy burynǵy Kolýmbııa revolıýtsııalyq qarýly kúshterimen (FARC) baılanysy bar oppozıtsııalyq top jasaǵanyn málimdedi.
Sýares bul árekettiń jazasyz qalmaıtynyn atap ótti.
— FARC dıssıdentteriniń áreketteri esirtki saýdasy men terrorızmniń aıqyn kórinisi. 2016 jylǵy beıbit kelisimge qarsy shyqqan bul top áıelderdi óltirip, balalardy óz qatarlaryna tartyp, halyqty qorqytý arqyly tolyq beıbitshilikke qarsy ekenderin taǵy da dáleldedi, — dedi ol.
Ýıla shtatynyń gýbernatory Rodrıgo Vılıalba da áleýmettik jelisindegi jazbasynda shabýyldy aıyptap, qaza tapqandardyń otbasylaryna kóńil aıtty.
Aıta ketelik anklavta eki kún ishinde 90-nan astam adam qaza tapty.