Kolýmbııa ýnıversıteti 180-ge jýyq qyzmetkerdi jumystan shyǵardy

ASTANA. KAZINFORM — Ýnıversıtet basshylyǵy bul qadamǵa qarjylandyrýdyń qysqarýyna baılanysty barýǵa májbúr bolǵanyn málimdedi, dep jazady Anadoly.

Palestınamen yntymaqtastyq aktsııalaryn qoldaǵany úshin AQSh prezıdenti Donald Tramp ákimshiliginiń synyna ushyraǵan Kolýmbııa ýnıversıteti 180-ge jýyq qyzmetkerdi jumystan shyǵaratynyn habarlady.

Ýnıversıtet basshylyǵy qarjylandyrýdyń azaıýyna baılanysty osyndaı sheshim qabyldaýǵa májbúr bolǵanyn aıtty.

Basshylyqtyń málimetinshe, federaldy qarjylandyrý esebinen jumys istegen shamamen 180 qyzmetker jumystan bosatyldy.

Ýnıversıtet ókili Djessıka Merfıdiń aıtýynsha, ýnıversıtet «qarjylyq ıkemdilikti» arttyrý úshin zeınetkerlikke shyǵýdy yntalandyratyn baǵdarlamalar tárizdi birqatar shara qabyldaǵan.

— Kolýmbııa ýnıversıtetindegi zertteýler sany qysqartylady, keıbir zertteý tolyǵymen toqtatylady, al qazirgi zertteýler balamaly qarjylandyrý kózderi esebinen jalǵasady, — dep atap ótti ol.

Ýnıversıtet basshylyǵy bul sheshim sozylmaly aýrýlardy emdeýge baılanysty jobalardan bastap onkologııa salasyndaǵy zertteýlerge deıingi birqatar jobaǵa áser etetinin málimdedi.

AQSh-ta ýnıversıtetterdiń federaldy qarjylandyrýyn toqtatýǵa qatysty bastamalar tóńireginde pikirtalastar tolastar emes. Óz kezeginde bılik ýnıversıtet kampýstaryndaǵy Palestınaǵa qoldaý kórsetý aktsııalaryna jáne ártúrlilik, teńdik pen ınklıýzıvtilikke qatysty baǵdarlamalarǵa silteıdi.

Tramp ákimshiliginiń «antısemıtızmmen kúres» saıasaty aıasynda synǵa ushyraǵan Kolýmbııa ýnıversıteti oqý ornynyń 400 mıllıon dollar kólemindegi qarjylandyrýyn saqtap qalý úshin bıliktiń talaptaryn oryndaý týraly sheshim qabyldaǵanyn habarlady.

Budan buryn AQSh Garvard-qa bólinetin 2,2 mlrd dollar memlekettik qarjylandyrýdy toqtatatynyn jazǵan bolatynbyz.

Sonymen qatar Tramp ákimshiligi Garvardtan sheteldik stýdentterdi qabyldaý quqyǵyn alyp qoımaq.

Budan bólek ol Garvardqa bólgen 1 mlrd dollar qarjyny keri qaıtaryp almaqshy.