Kolýmbııa prezıdentin qyzmetinen ýaqytsha shettetý týraly sheshim daý týǵyzdy
ASTANA. KAZINFORM – Kolýmbııa Kongresi Ókilder palatasynyń Tergeý jáne aıyptaý komıssııasynyń tóraıymy prezıdentti saılaý naýqanyna yqtımal aralasý isi boıynsha tergeý aıasynda ýaqytsha qyzmetinen shettetý týraly ókim shyǵardy, dep habarlaıdy Euronews.
Bul shara elde prezıdent saılaýynyń ekinshi týry aıaqtalatyn 21 maýsymǵa deıin kúshinde bolady. Al Gýstavo Petro saılaýǵa qatysyp jatqan joq, onyń ókilettik merzimi tamyz aıynda aıaqtalady.
Qyzmetinen ketýge daıyndalyp jatqan prezıdentke óziniń jarııa málimdemeleri arqyly kandıdattardyń birin janama túrde qoldady, daýly pikirler aıtty jáne daýystardy sanaýdyń ashyqtyǵy men ádildigine kúmán keltirdi degen aıyp taǵylyp otyr.
Kolýmbııanyń saılaý komıssııasy memleket basshysy derekterdi qate túsindirgenin jáne eshqandaı burmalaý týraly sóz bolmaıtynyn málimdedi.
Kolýmbııanyń Іshki ister mınıstri Armando Benedettı prezıdentti qyzmetinen shettetý týraly ókimdi konstıtýtsııaǵa qaıshy dep atady. Onyń aıtýynsha, memleket basshysyn qyzmetinen shettetý quqyǵy Ókilder palatasynyń jekelegen komıssııasyna emes, tek Senatqa tıesili.
Qazir Nıý-Iork qalasynda júrgen Gýstavo Petro (Kolýmbııa BUU Qaýipsizdik Keńesine ýaqytsha tóraǵalyq etip otyr) tamyz aıynda qyzmetinen ketetinine kepildik beretinin aıtty.
Sondaı-aq ol saıası jaǵdaıdy paıdalanyp, bılikte qalýǵa tyrysady degen kúdikterdiń negizsiz ekenin málimdedi.
Aıta keteıik, buǵan deıin 21 maýsym kúni Kolýmbııada prezıdent saılaýynyń ekinshi týry ótetinin habarladyq.
