Kolýmbııa prezıdenti el halqyn sýdy únemdeýge shaqyrdy
ASTANA. QazAqparat – Kolýmbııa prezıdenti Hýan Manýel Santos senbi kúni qurǵaqshylyqqa uryndyratyn klımattyq "El-Nıno" ataýyna ıe bolǵan aptap ystyqtyń jaqyndaýyna oraı el halqyn sýdy jáne elektr energııasyn únemdeýge shaqyrdy.
«Men kolýmbııalyqtan sý men energııany únemdeý úshin bar múmkindikti paıdalanýdy ótinemin. Tabıǵat qubylysyna tótep berýde bul óte mańyzdy bolmaq»,-degen Santostyń sózin keltiredi Notimex agenttigi.
Memleket basshysynyń aıtýynsha, bılik tarapynan "El-Nınonyń" zardabyn azaıtý baǵytynda bar múmkindik qarastyrylyp jatyr. Kútilip otyrǵan qurǵaqshylyq birneshe aıǵa sozylýy múmkin.
Eske sala ketsek, 1997-1998 jáne 1982-1983 jyldary «El-Nıno» kúsh alǵan kezde muhıttyń joǵary jaǵyndaǵy temperatýra 28 gradýsqa jetip, Ekvadordyń shyǵysynda jáne Perýdiń soltústiginde sý tasqyny boldy, al kórshi aýdandarda qurǵaqshylyq oryn aldy.
