Kolýmbııa prezıdenti kokaınniń «vıskıden jaman emes» ekenin málimdedi

ASTANA. KAZINFORM – Kolýmbııa prezıdenti Gýstavo Petro tikeleı efırde ótken alty saǵattyq úkimet otyrysynda zańdastyrylǵan kokaındi «sharap sııaqty» satýǵa bolatynyn aıtty, dep habarlaıdy Euronews.

Kolýmbııa prezıdenti Gýstavo Petro «kokaın vıskıden jaman emes» dep málimdep, oǵan tek Latyn Amerıkasynan ákeletindikten ǵana tyıym salynǵanyn eske saldy. 

Bılikke 2022 jyldyń tamyzynda kelgennen beri Ońtústik Amerıka elinde ósip kele jatqan kokaın óndirisimen kúresip jatqan solshyl kóshbasshy bul týraly tarıhta alǵash ret tikeleı efırde kórsetilgen mınıstrlerdiń alty saǵattyq kezdesýinde málimdedi.

- Kokaınge vıskıden nashar bolǵandyqtan emes, Latyn Amerıkasynda óndirilgendikten tyıym salynǵan, - dedi M-19 partızandyq qozǵalysynyń burynǵy múshesi Petro.

BUU Esirtki jáne qylmys jónindegi basqarmasynyń (BUU EQKB) habarlaýynsha, Kolýmbııa álemdegi eń iri kokaın óndirýshi jáne esirtkiniń negizgi ıngredıenti - koka japyraqtaryn ósirýde 2023 jyly rekordtyq deńgeıge jetti.

- Eger bireý beıbitshilikti qalasa, onda bıznes (esirtki saýdasy) joıylý kerek. Kokaındi búkil álemde zańdastyrý arqyly ony ońaı joıýǵa bolady. Ol sharap sııaqty satylatyn edi, - dep sanaıdy Kolýmbııa prezıdenti. 

2023 jyly Kolýmbııada shamamen 253 myń ga aýylsharýashylyq alqabyna koka egildi. Bul aldyńǵy jylmen salystyrǵanda 10%-ǵa kóp, dep habarlaıdy BUU EQKB.

Aıta keteıik, Kolýmbııada 1400 tonna esirtki tárkilendi.