Kolýmbııa men Meksıkada Garsıa Markespen qoshtasý sharasy ótýde
ASTANA. QazAqparat - Kolýmbııa men Meksıkada ótken aptada qaıtys bolǵan ádebıet boıynsha Nobel syılyǵynyń ıegeri jazýshy Gabrıel Garsıa Markespen qoshtasý rásimi ótip jatyr, dep habarlaıdy Rosbalt.
Meksıka jáne Kolýmbııa prezıdentteri bul sharaǵa qatysý úshin jazýshy 30 jyldaı ómirin ótkizgen Mehıko qalasyna keledi dep kútilýde. Buǵan qaramastan Markes dúnıege kelgen Arakataka qalasynyń turǵyndary ózderi jeke qoshtasý ótkizbekshi, dep jazady VVS. Onyń «Júz jyldyq jalǵyzdyq» atty ataqty romanyndaǵy Makondo eldimekenine osy qala negizge alynǵan deıtin boljam bar.
Esterińizge sala keteıik, 2009 jyly bul roman Wasafiri ádebı jýrnalynyń saraptamasy boıynsha sońǵy 25 jyl boıyndaǵy qoǵamǵa eń yqpaldy kitap dep tanylǵan bolatyn.
Gabrıel Markes ótken beısenbide Mehıko qalasynda 87 jasynda dúnıeden ótti. Ol ádebıettegi «magııalyq realızm» baǵytynyń kórnekti ókili jáne álem ádebıetiniń sheberi sanalady.
