Kolýmbııa Qazaqstanmen qarym-qatynasyn tereńdetýge múddeli - Elshi

ASTANA. QazAqparat - Kolýmbııa Qazaqstanmen qarym-qatynasyn tereńdetýge múddeli. Bul týraly búgin Aqordada QR Memlekettik hatshysy Gúlshara Ábdiqalyqova senim gramotasyn tabystaǵan Kolýmbııa Respýblıkasynyń Elshisi Alfonso Lopes Kabaler aıtty, dep habarlaıdy QazAqparat.

«Memlekettik hatshy hanymmen óte qyzyqty kezdesýdiń ótkenin aıta alamyn. Biz Qazaqstan men Kolýmbııa arasyndaǵy oń qarym-qatynasty atap óttik. Kolýmbııa birneshe márte Qazaqstannyń halyqaralyq bastamalaryna qoldaý kórsetken bolatyn. Máselen, elderińizdiń BUU Qaýipsizdik keńesiniń turaqty emes múshesi bolýyna qoldaý kórsettik. Qazaqstan óz kezeginde Kolýmbııa ahýalyn retteý úshin ekinshi mıssııa jóneltýdi qoldady. Degenmen, bizdiń elderimizdiń arasyndaǵy kommmertsııalyq jáne mádenı salalardaǵy yntymaqtastyqty damytý úshin áli de bolsa kóp jumys isteý qajet. Biz qarym-qatynastarymyzdy tereńdetýge shynaıy túrde daıynbyz», - dedi Elshi kezdesýden keıin BAQ ókilderine bergen suhbatynda.

Aıta keterligi, kezdesý barysynda Memlekettik hatshy Qazaqstan men Kolýmbııa arasyndaǵy  ekijaqty ózara árekettestiktiń qozǵaýshy kúshi saýda-ekonomıkalyq yntymaqtastyq bolýy qajet dep esepteıtindigin aıtqan bolatyn. «Osyǵan oraı taýar aınalymy men ózara ınvestıtsııalardy artyrýǵa nazar aýdara otyryp, iskerlik baılanystarymyzdy jandandyrýymyz kerek», - dedi Gúlshara Ábdiqalyqova Kolýmbııa Elshisimen kezdesýi barysynda.