Kolýmbııa Izraılmen dıplomatııalyq qarym-qatynasyn úzdi
ASTANA. KAZINFORM –Kolýmbııa prezıdenti Gýstavo Petro Bogota beısenbi kúni Izraılmen dıplomatııalyq qarym-qatynasyn toqtatatynyn málimdedi. Ol Izraıl armııasynyń Gazadaǵy áreketterin Palestına halqynyń genotsıdi dep atady, dep jazady VVS.
Buǵan deıin Kolýmbııa Izraılden qarý satyp alýdy toqtatqan bolatyn.
«Erteń (beısenbi) Izraıl memleketimen dıplomatııalyq qarym-qatynastar úziledi... óıtkeni olardyń úkimeti men prezıdenti genotsıd jasaýda», - dedi Petr Bogotadaǵy 1 mamyr sherýinde.
Kolýmbııa prezıdenti buǵan deıin 7 qazanda Izraılge shabýyl jasaǵan HAMAS tobyna qarsy soǵysty birneshe ret qatań synǵa alǵan bolatyn.
«Eger Palestına qurysa, adamzat ta qurıdy», - dedi Petr Palestınany qoldaıtyn plakattar ustaǵan kópshilik aldynda.
Izraıl bıligi Petronyń sózderin antısemıttik jáne óshpendilik týdyratyn sózder dep atap, Kolýmbııa prezıdentiniń ustanymy HAMAS-ty jaqtaýǵa parapar dep sanaıdy.
«Tarıh Gýstavo Petronyń sábılerdi órtegen, balalardy óltirgen, áıelderdi zorlaǵan jáne jazyqsyz beıbit turǵyndardy urlaǵan adamzatqa belgili eń jıirkenishti qubyjyqtarmen birge bolýdy sheshkenin umytpaıdy», - dep jazdy Izraıl Syrtqy ister mınıstri Israel Kats H áleýmettik jelisinde.
Kolýmbııanyń Evreı qaýymdastyǵynyń konfederatsııasy eki el arasyndaǵy qarym-qatynastardy baýyrlastyq dep ataǵan málimdeme jasap, «osy baılanystardy saqtaýǵa, dıalog úshin ashyq arnalardy qaldyrýǵa» shaqyrdy.
Radıkaldy Palestına toby bul oqıǵany óz tarapynan «jeńis» dep atady.
Izraıl 7 qazanda HAMAS shabýylynan keıin Gazada shabýyl jasady, onda 1200 ızraıldik qaza taýyp, 250-den astm adam kepilge alyndy.
Sodan beri Gazadaǵy HAMAS-tyń baqylaýyndaǵy Densaýlyq saqtaý mınıstrliginiń málimeti boıynsha, 34 myńnan astam palestınalyq qaza taýyp, halyqtyń kópshiligi úılerin tastap ketýge májbúr boldy.
