Kolýmbııa El-Nıno qubylysy bastalǵanyn rastady
ASTANA. KAZINFORM — Kolýmbııa úkimeti El-Nıno klımattyq qubylysynyń bastalǵanyn resmı túrde jarııalady. Bul qubylys, ásirese, And taýlary, Tynyq muhıty jaǵalaýy jáne Karıb alaby óńirlerinde jaýyn-shashyn mólsheriniń azaıýyna ákelýi múmkin, dep jazady Anadoly.
Kolýmbııanyń Gıdrologııa, meteorologııa jáne qorshaǵan ortany zertteý ınstıtýtynyń (Ideam) dırektory Andres Herkrat Sanselemente Bogotadaǵy Kasa-de-Narıno prezıdent saraıynda málimdeme jasap, El-Nınonyń klımatqa yqtımal áserine daıyndyq sharalary týraly aıtty.
Onyń sózinshe, eldiń birqatar óńirinde jaýyn-shashynnyń azaıýyna sebep bolýy múmkin klımattyq qubylys bastalyp ketken.
— Búginde Kolýmbııada El-Nıno qubylysynyń bastalǵanyn resmı jarııalaýǵa qajetti tehnıkalyq sharttar qalyptasty, — dedi Sanselemente.
Ol bul klımattyq qubylystyń keminde 2027 jyldyń naýryzyna deıin saqtalý yqtımaldyǵy 83 paıyz ekenin atap ótti.
Sonymen qatar Sanselemente El-Nıno jańbyr múlde jaýmaıdy degendi bildirmeıtinin eskertti. Boljam boıynsha qazan jáne qarasha aılarynda jaýyn-shashyn mólsheri maýsymdyq normadan tómen bolady. Al eń joǵary tapshylyq jeltoqsanda kútiledi.
Kolýmbııanyń Tabıǵı apattar qaýpin basqarý jónindegi ulttyq bóliminiń (UNGRD) dırektory Davıd Tamaıo daıyndyq sharalarynyń oryndalýyn baqylaý jáne yqtımal tótenshe jaǵdaılarǵa jedel den qoıý úshin túrli mekemeler arasyndaǵy aqparat almasýdy úılestirý mindeti vedomstvoǵa júkteletinin habarlady.
Energetıka salasyndaǵy qaýipter
Kolýmbııanyń Taý-ken ónerkásibi jáne energetıka mınıstri Marııa Noemı Arboleda elektrmen jabdyqtaýda úzilister bolý qaýpin azaıtýǵa baǵyttalǵan tórt baǵyttan turatyn shuǵyl sharalar josparyn jarııalady.
Onyń aıtýynsha, jospar energııany únemdeý, otyn men gaz jetkizýdi qamtamasyz etý, jylý elektr stantsııalarynyń jumysyn uıymdastyrý jáne qolda bar elektr óndirý qýattaryn tıimdi paıdalaný sharalaryn qamtıdy. Arboleda azamattardyń da elektr energııasyn únemdeýge jaýapkershilikpen qaraýy kerektigin atap ótti.
Mınıstr elektr energııasyn tutynýdy belgilengen mejemen salystyrǵanda 10 paıyzdan astam qysqartqan tutynýshylarǵa yntalandyrý sharalaryn usyný josparlanyp otyrǵanyn aıtty. Budan bólek, sý qoımalaryndaǵy sý qoryn saqtaý sharalary da qarastyrylǵan.
Arboledanyń málimdeýinshe, elektr energııasynyń yqtımal úzilýine jol bermeýge baǵyttalǵan qajetti sharalar 31 jeltoqsanǵa deıin júzege asyrylady.
Al Qorshaǵan orta mınıstri Fabıo Arhona óńirlerge sý resýrstary men ekojúıelerdi qorǵaý, orman órtteriniń aldyn alý jáne klımattyq qubylystyń aýyl sharýashylyǵy óndirisine keri áserin azaıtý baǵytynda qoldaý kórsetiletinin málimdedi.
Buǵan deıin El-Nıno 2027 jylǵa deıin jalǵasýy múmkin ekenin habarlaǵan bolatynbyz. Qazirgi El-Nıno tarıhtaǵy eń kúshti qubylystardyń birine aınalýy múmkin.
