Kolýmbııa AQSh-pen yntymaqtastyǵyn toqtatty
ASTANA. KAZINFORM — Kolýmbııa prezıdenti Gýstavo Petro óz eliniń qaýipsizdik kúshterine AQSh-pen barlaý derekterimen almasýdy toqtatýǵa buıryq berdi, dep habarlaıdy NBC News.
Ol bul sheshimdi Tramp ákimshiligi Karıb teńizinde esirtki saýdasyna kúdiktilerge qarsy shabýyldardy toqtatpaı otyrǵandyqtan qabyldaǵanyn aıtty. Esirtki saýdasyna qarsy kúreste bir kezderi tyǵyz seriktes bolǵan elder arasyndaǵy qarym-qatynas nasharlap barady.
Petro X áleýmettik jelisinde Kolýmbııa qarýly kúshteri AQSh tarapynan esirtki tasymaldady degen kúdikke ilingen jyldam qaıyqtarǵa shabýyldar toqtatylmaıynsha, «amerıkalyq qaýipsizdik qyzmetterimen barlyq baılanys pen yntymaqtastyqty dereý toqtatýy kerek» dep jazdy.
Petronyń aıtýynsha, «esirtkige qarsy kúres Karıb basseıni elderindegi adam quqyqtaryna baǵynýy tıis».
Tramp ákimshiliginiń málimetinshe, AQSh áskerı kúshteriniń halyqaralyq sýlardaǵy shabýyldarynan kem degende 75 adam qaza tapty. Shabýyldar alǵashynda Karıb teńiziniń ońtústiginde, Venesýela jaǵalaýyna jaqyn jerde bastalǵan. Alaıda keıinnen AQSh soqqylardy Meksıka jaǵalaýyndaǵy kemelerge baǵyttap, Tynyq muhıtynyń shyǵys bóligine aýystyrdy.
Petro AQSh prezıdenti Donald Trampty Venesýela, Ekvador, Kolýmbııa jáne Trınıdad pen Tobago azamattary zardap shekken qylmystary úshin jaýapkershilikke tartýǵa shaqyrdy.
Kolýmbııa Prezıdenti AQSh-tyń esirtkige qarsy saıasatyn uzaq ýaqyttan beri synap keledi. Ol Tramp ákimshiligin iri esirtki satýshylar men aqshany zańdastyrýmen aınalysatyndarmen kúresýdiń ornyna, kokaınniń negizgi shıkizaty sanalatyn koký ósiretin sharýalardy qýdalaıdy dep aıyptady.
Tramp ákimshiligi Petrony esirtki saýdagerlerine jumsaqtyq tanytty dep aıyptady jáne Kolýmbııa prezıdentiniń esirtki saýdasyna qatysy bar kolýmbııalyq kóterilisshi kóshbasshylardy Qurama Shtattarǵa ekstradıtsııalamaý týraly sheshimin synǵa aldy. Qazan aıynda ákimshilik Petro men onyń otbasy múshelerine qarsy halyqaralyq esirtki saýdasyna qatysy bar degen kúdikpen qarjylyq sanktsııalar saldy.
AQSh pen Kolýmbııa arasyndaǵy shıelenis AQSh-tyń Karıb basseıniniń ońtústigindegi áskerı-teńiz kúshteriniń qatysýyn arttyrǵan kezde kúsheıe tústi.
Buǵan deıin AQSh-tyń ushaq tasymaldaǵysh kemeleri Karıb teńizi aıdynyna engenin jazǵan bolatynbyz.