Kolýmbııa AQSh-qa esirtki kartelderine qarsy birlesken operatsııa júrgizýge ruqsat berdi
ASTANA. KAZINFORM – Kolýmbııanyń jańa prezıdenti Abelardo de la Esprıelıa AQSh-qa el aýmaǵynda esirtki saýdasy men esirtki terrorızmine qarsy birlesken áskerı operatsııalar júrgizýge ruqsat berdi, dep habarlaıdy Euronews.
Bul týraly AQSh Qorǵanys mınıstri Pıt Hegset Panamada ótken Amerıka elderiniń esirtki kartelderine qarsy kúres koalıtsııasynyń (Americas Counter-Cartel Coalition) otyrysynda málimdedi.
Koalıtsııa AQSh prezıdenti Donald Tramptyń bastamasymen qurylǵan. Oǵan aımaqtaǵy 19 memleket, sonyń ishinde Argentına, Salvador, Ekvador jáne Gondýras kiredi.
Bogotanyń bul sheshimi Kolýmbııanyń qaýipsizdik saıasatyna eleýli ózgeris engizedi. El burynǵy prezıdent Gýstavo Petro tusynda júrgizilgen «totaldy beıbitshilik» saıasatynan birtindep bas tartyp, esirtki saýdasymen kúrestiń qatań ádisterine kóship jatyr.
Buǵan deıin AQSh Kolýmbııanyń jańa prezıdentine esirtki kartelderine qarsy kúreske 1 mlrd dollar bóletini habarlanǵan bolatyn.
Eske salaıyq, Kolýmbııanyń Ulttyq saılaý keńesi (CNE) 21 maýsymda ótken prezıdent saılaýynyń qorytyndysy boıynsha ońshyl kandıdat Abelardo de la Esprıelıany jeńimpaz dep resmı jarııalaǵan edi.
