Qoltyraýynmen oınaǵan jigit ǵalamtorda tanymal boldy - VIDEO
ASTANA. QazAqparat - Kosta-Rıkanyń turǵyny óziniń qoltyraýynmen oınap júrgenin taspaǵa túsirip, ǵalamtorǵa salyp qoıǵan. Áleýmettik jelidegi jazbany tamashalaǵandar, onyń alyp qoltyraýynmen oıynyna tań qalyp, tipti bul áreketin erlikke balady, dep jazady Dnı rý.
Beınejazbada batyl jigit sýdyń jaǵasynda turyp alyp balyqtyń kómegimen qoltyraýyndy qasyna keltirgeni bar. Alyp qoltyraýyn qasyna jaqyn kelse de, álgi jigit qorqar emes. Tipti, qolyndaǵy balyǵyn ári-beri sermep, jyrtqyshtyń esin shyǵarady. Eń qorqynyshtysy, balyqty aýyzymen tistep qoltyraýynǵa jegizedi.
Beınejazbada jigittiń bul ermeginen eshkim zardap shekpegenin baıqaýǵa bolady. Avtordyń aıtýynsha, bul oıyndy birneshe jyl buryn Kosta-Rıkada oqý oqyp júrgen kezde túsirgen. Sanaýly kún ishinde jazbany 100 myńnan astam adam tamashalaǵan eken.
Jalpy, qoltyraýynmen oınamaq túgeli, oǵan jaqyn kelýdiń ózi adam úshin qaýipti. Tipti, kóp jaǵdaıda mundaı «baılanystyń» arty qaıǵyǵa ákelip soǵady desek bolady. Atap aıtsaq, eki jyl buryn Indonezııada Ýeılolong ózeninde qoltyraýyn jaǵada ákesimen oınap júrgen 10 jastaǵy qyz balany tistep alyp ketken bolatyn.
