«Qoltyraýyn» esirtkisin tutyný jaǵdaılary jıilep ketti - QR ІІM
TANA. 2 qarasha. QazAqparat /Jasulan Amanbaıuly/ - Sońǵy kezderi Qazaqstanda qoldan beıbereket jasalǵan dezomorfındi qoldaný jaǵdaılary jıilep ketti. Bul týraly búgin baspasóz máslıhatynda QR Іshki ister vıtse-mınıstri Qaırat Tynybekov málim etti.
Onyń aıtýynsha, ázirshe, «qoltyraýyn» dep atalyp ketken dezomorfın esirtkisi Soltústik Qazaqstan men Pavlodar oblysynda jaılap barady. Dezomorfın 2002 jyly Reseıde paıda bolyp, 2005 jyldan bastap etek jaıdy. Qazir ol kórshi elde taralýy jóninen geroınnen keıin ekinshi orynda.
«Dezomorfın kórshi Reseıde ulttyq náýbetke aınaldy. Erteń bul bizge de kelmesine kim kepil. Sondyqtan qazirden bastap oǵan tosqaýyl qoıýmyz kerek», - dedi vıtse-mınıstr.
Densaýlyq saqtaý mınıstrliginiń Medıtsınalyq jáne varmatsevtıkalyq qyzmetti baqylaý komıtetiniń tóraǵasy Larısa Paktyń atap ótkenindeı, dezomorfındi ázirleý úshin arnaıy hımııalyq bilimniń qajeti joq. Iod, kúkirt qyshqyly, eritkish jáne quramynda kodeıni bar preparattar bolsa jetkilikti. Baǵasy arzan bolǵan soń, keń taraýyna da qolaıly.
«Dezomorfındi paıdalanǵan adamnyń denesi kógerip, terisi qabyrshaqtanady. «Krokodıl» atanýy da sondyqtan. Ol keń taraǵan esirtkilerdiń ishindegi eń qaýiptisi. Qospaǵa kúkirt qyshqyly, atseton sııaqty túrli eritindiler qoldanylady. Ony qoldanatyn nashaqorlardyń denesi shirı bastaıdy», - deıdi ol.
Qazirgi ýaqytta elimizde esirtki quraldary, psıhotroptyq zattar men prokýsorlardy paıdalanatyn nashaqorlardyń sany - 47 833, onyń ishinde áıelder sany - 3754, kámeletke tolmaǵandar sany - 2653.
