Atyraý oblysyndaǵy kólshikterde 33,9 mıllıon shabaq qutqaryldy
ATYRAÝ. KAZINFORM — Qurmanǵazy aýdanyndaǵy Qıǵash jáne Sharon ózenderine ór sýy kelip, keıin ózen deńgeıi bir qalypqa túskennen soń bólinip qalǵan jaıylma sýlardan qutqarylǵan balyq shabaqtarynyń sany birneshe ese kóbeıdi. 15 maýsym men 20 shilde aralyǵynda tabıǵı mekenine jiberilgen shabaq sany 33,9 mıllıonǵa jetti.
Jaıyq-Kaspıı oblysaralyq basseındik balyq sharýashylyǵy ınspektsııasynyń málimetinshe, osy kezeńde ınspektsııa mamandarynyń uıymdastyrýymen jaıylma sýlarda qalyp qoıǵan 33 mln 892 myń balyq shabaǵy qutqarylyp, tabıǵı mekendeıtin ortasy — Qıǵash jáne Sharon ózenderine jiberilgen. Qutqarylǵan shabaqtardyń jalpy salmaǵy 106 tonna boldy.
Shabaqtardy qutqarý jumysy barysynda sý aıdyndaryn ózendermen jalǵaý úshin 11 023 tekshe metr aryq qazylyp, 15 886 sharshy metr aýmaqtaǵy shóp shabylǵan. Naýqanǵa 108 adam, 27 tehnıka jáne 235 qutqarý quraly jumyldyrylǵan.
Balyq ınspektsııasy óńir turǵyndaryn balyq shabaqtaryn qutqarý jumystaryna atsalysýǵa shaqyryp, balyqtardyń tunshyǵýy nemese jappaı qyrylý derekteri anyqtalǵan jaǵdaıda ınspektsııaǵa nemese jergilikti atqarýshy organdarǵa habarlaýdy surady.
Aıta keteıik, mundaı jumys Qurmanǵazy aýdanymen qatar Atyraý qalasy mańynda da jalǵasyp jatyr. Máselen, 17 shildede Atyraý balyq ınspektsııasy bóliminiń mamandary Besikti aýyly mańyndaǵy balyqtardyń ýyldyryq shashatyn orny sanalatyn Bezymıannyı sý aıdynynda ıhtıologııalyq monıtorıng júrgizip, balyq sharýashylyǵy sýbektilerimen birlesip 7 myńǵa jýyq balyq shabaǵy Jaıyq ózenine jiberilgen.
Eske salaıyq, Bıyl Qurmanǵazy aýdanyndaǵy ózenderge sý mol kelip, aýdan aýmaǵyndaǵy barlyq 123 sý aıdynyna jetti. Sonyń nátıjesinde buryn sý baspaǵan jerlerde qosymsha 22 kólshik paıda bolǵan edi.
Buǵan deıin oqshaýlanyp qalǵan kólshikter men saılardan 12 mıllıon 237 myń shabaq qutqarylǵanyn jazdyq. Olardyń basym bóligin qyzylqanat, kókserke, móńke, sazan, shortan, qarakóz, taban jáne jaıyn quraıdy. Bir shabaqtyń ortasha salmaǵy - 1,6 gramm.
