Kólsaıdaǵy Qaıyńdy kólinde sý tospasyn salý ózekti másele - depýtat T. Asanov
ASTANA. 8 aqpan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Turarbek Asanov Kólsaı kóline deıingi respýblıkalyq mańyzy bar avtomobıl jolyn jóndeý máselesin kóterdi.
«Kólik jáne kommýnıkatsııa mınıstrligi atalǵan joldyń qashyqtyǵy barlyǵy 89 ǵana shaqyrymdy quraıtyndyǵyna qaramastan, jóndeý jumystaryn negizsiz sozyp, aıaqtaý merzimin jyldan-jylǵa yǵystyryp keledi. Buǵan 2009 jyly bastaýyn alǵan, joldyń 21-inshi shaqyrymynan 43-inshi shaqyrymǵa deıingi ýchaskesiniń jóndeýi, endi 2013 jylǵa deıin sozylýy aıqyn dálel. Onyń ústine, osy joldyń Jalańash eldi mekeninen Kólsaı kóline deıingi (43-inshi shaqyrymnan 89-ynshy shaqyrymǵa deıingi bóligi) ýchaskesiniń kóp bóligi isten shyqqan, ol kúrdeli jóndeýden ótkizýdi jáne qalypqa keltirýdi qajet etetindigi anyq. Biraq atalǵan mınıstrlik búgingi ýaqytqa deıin bunyń tehnıkalyq-ekonomıkalyq negizdemesin daıyndaýǵa esh shara qoldanǵan joq», - deıdi depýtat.
Onyń aıtýynsha, jol azaby aımaqta ornalasqan 9 eldi meken turǵyndarynyń jáne tabıǵı baılyǵy mol «Qazaqstannyń injý-marjany» atanǵan Kólsaı kólin tamashalaýǵa kelgen 20 myńnan astam saıahatshynyń janyna qatty batyp otyr.
«Sonymen qatar, aǵymdaǵy jyldyń 21 sáýirinde «Kólsaı kólderi» memlekettik ulttyq tabıǵı park aýmaǵyndaǵy Qaıyńdy kólinde sý tospasyn salý týraly da másele kótergenbiz. Osy másele 2012-2014 jyldarǵa arnalǵan respýblıkalyq bıýdjettiń jobasyn ázirleý kezinde eskerilýi tıis edi. Alaıda, Aýyl sharýashylyǵy jáne Tótenshe jaǵdaılar mınıstrlikteri jaýapkershilikti bir-birine siltep, eshqandaı jumys júrgizgen joq», - deıdi T. Asanov.
Onyń aıtýyna qaraǵanda, atalǵan jumysty keıinge qaldyrýǵa bolmaıdy. Óıtkeni, kóldegi sý tabıǵı erneýdi buzyp tasqyn bolsa, Saty aýylyn Qaıyńdy kólimen baılanystyratyn avtojoldy isten shyǵaryp, Qaıyńdy ózeniniń boıyndaǵy toǵaılarǵa orasan zor zııan keltiredi. Sonymen qatar Shelek ózeniniń tómengi arnasynda ornalasqan Alǵabas-Jańatalap aýyldary men Bartoǵaı sý qoımasyna da zor qaýip tóndiredi», - deıdi depýtat.
