Kólsaıda tıisti shekteý engizbesek, eń kórikti jerden aıyrylyp qalamyz - depýtat

ASTANA. QazAqparat – Búgin Májilistiń jalpy otyrysynda depýtat Danııar Qasqaraýov Kólsaı kólderi aýmaǵyndaǵy ekologııalyq máseleni kóterip, Premer-Mınıstrdiń orynbasary Tamara Dúısenovanyń atyna saýal joldady, dep habarlaıdy QazAqparat tilshisi.

«Almaty oblysynda Jetisýdyń jaýhary, elimizdegi jeti keremettiń birine balanǵan Kólsaı kólderi bar. Ulttyq park aýmaǵyndaǵy eń shuraıly jerler kezinde jekeniń qolyna ótip ketken. Basynda bul jerler aýyl sharýashylyǵy maqsatynda, shabyndyq jáne jaıylymǵa dep berilgen. Endi kásipkerler qonaqúı, basseın, dámhana salyp jatyr. Málimet boıynsha olarda qurylys salýǵa ruqsat qaǵazdary joq. Jer maqsatsyz paıdalanylyp jatyr. Al ulttyq park aýmaǵynda kapıtaldy qurylys júrgizýge bolmaıdy degen erejeni eshkim elemeıdi. Quzyrly oryndar da ony tekserýge, shara qoldanýǵa qulyqsyz», - dedi D. Qasqaraýov.

Resmı málimetke qaraǵanda, keıingi bir jarym jylda «Kólsaı» kólderine jarty mıllıon týrıst kelipti.

«Kóldiń aınalasynda bos jer joq. Aınalanyń bárine shamamen úsh júzdeı kıiz úı men tamaqtaný shatyrlary tigilgen. Eshqaısysynda dárethana qoıylmaǵan. Taýly aımaqta káriz júıesi bolmaǵandyqtan, shaıyndy sýlar jerge sińip jatyr. Septık, assenızator degen atymen joq. Osynyń saldarynan tumsa tabıǵattyń ekologııasy buzylyp jatyr. Tútini býdaqtaǵan kólikter de kóldiń basyna deıin barady. Sondyqtan Kólsaıda da tıisti shekteý engizbesek, endi 5-6 jylda elimizdegi eń kórikti jerden aıyrylyp qalamyz. Biz syrtqa ketken aktıvterdi qaıtaramyz dep jańa zań qabyldadyq. El ishinde de kezinde qoldy bolǵan, arzan baǵaǵa satylǵan, zańsyz ózgeniń ıeligine ótken osyndaı shuraıly, erekshe qorǵaýdy qajet etetin jerler bar. Arnaıy komıssııa qurylyp, solardy keshendi tekserý kerek. Osy rette jalǵyz Kólsaı emes, barlyq ulttyq park aýmaǵyndaǵy satylǵan, uzaq jylǵa jalǵa berilgen jerlerdiń zańdylyǵyn tekserip, memleket menshigine qaıtarý qajet dep sanaımyn», - dedi depýtat.