Kólsaıda konkı tepken almatylyq mánerlep syrǵanaýshy jurtty súısindirdi
ALMATY. QazAqparat - Almatylyq mánerlep syrǵanaýshy Ksenııa Pankratova Kólsaıda konkı teýip, taǵy da kópshiliktiń yqylasyna bólendi, dep habarlaıdy QazAqparat tilshisi.
Ksenııa Pankratova syrǵanaǵan sátin Instagram paraqshasynda jarııalap, «Kólsaıdyń ǵajaıyp muzy», degen jazý qaldyrdy.
Jeli qoldanýshylary vıdeo astyna «Ǵajaıyp», «Sondaı ádemi», «Sándi vıdeo», «Tamasha», «Ádettegideı teńdessiz», «Qazaqstannyń týyn alyp syrǵanaǵanda odan da keremet bolar edi», «Ertegidegideı», - degen pikir qaldyryp, jyly lebizderi jetkizip, tańqalysty.
Aıta ketsek, bıyl jyl basynda Ksenııa Pankratova muz qatqan Qapshaǵaı sý qoımasynda qyzyl kóılekpen syrǵanap, jeli qoldanýshylarynyń kózaıymyna aınalǵan edi.
Sondaı-aq, sáýir aıynda mánerlep syrǵanaýshy Baıanaýyldyń sulýlyǵyn kórsetip, jelidegilerdi taǵy qýantty.
Eske salsaq, sportshy, bapker Ksenııa Pankratova Úlken Almaty kólinde mánerlep syrǵanap, 2018 jyldan bastap, kópshiliktiń kóńilinen shyǵa bastap edi.
