Kólsaıda eki kún demalýdyń quny 15 myń teńge

​Kólsaıǵa qalaı jetýge bolady?

Kólsaı Almaty qalasynan 280 shaqyrym jerde ornalasqan. Avtobýspen barsańyz shamamen 4-4,5 saǵattaı jol júresiz. Joly jaqsy. Qazir Almaty qalasynyń ​ túrli týrıstik fırmalary bul baǵytqa ​ demalýshylardy tasymaldap, arnaıy demalysty uıymdastyrýmen qarqyndy aınalysýda. Ásirese juma-senbi, ıaǵnı demalys kúnderi kelýshilerdiń sany kúrt ósedi eken.

​«Almaty qalasynan avtobýstar ádette keshki saǵat 21:00 de shyǵady. Al jeksenbi kúni 15:00 de​ týrısterdi alyp qaıtady. Demek, týrıst eki kúndik demalys úshin 15 myń teńge tóleýi qajet. Ol jerge baryp-qaıtar joly, tórt mezgil tamaǵy, sýretke túsirý, gıdtiń qyzmeti, parkke kirer kezde tólenetin ekologııalyq tólemniń ​ bári kiredi», - dedi «Qazaq travel» týrıstik fırmasynyń ókili Jandos Nurıev.

​Týrıster qaı jerge toqtaıdy?

Kólsaı kóline kelgen demalýshylardy uıymdastyrýshylardyń kóbi Saty aýylyna jetkizedi. Saty aýyly Kólsaıdan 15 shaqyrym jerde ornalasqan. Týrfırmanyń ókilderi ary qaraı Kólsaıǵa ózderi jetkizedi. Al eger siz óz kóligińizben barsańyz Saty aýylynda túneýge bolady.

Bul jerde kez-kelgen úıdiń ıesi týrısti úıine qabyldaýǵa daıyn. Tórt mezgil tamaǵy qarastyrylǵan demalys úshin 5 myń teńge tóleısiz. Qyzmet túri sapasyna qaraı baǵasy óse beredi. ​

​Saty - týrısterdiń aýyly

Satynyń halqy týrısterdiń arqasynda nápaqalaryn taýyp otyrǵandaryn aıtady. Ár úı birneshe bólmesin bosatyp, neǵurlym kóbirek qonaq qabyldaýǵa jaǵdaı jasap qoıǵan. Eger dastarhan mázirin óz qalaýyńyzben josparlasańyz ​ qosymsha aqy tóleý kerek.

​Saty, Kólsaıda zamanaýı qonaq úıler bar ma?

Saty aýylynda da, Kólsaıdyń basynda da zaman talabyna saı demalys oryndary bar. Máselen, Saty aýylyndaǵy eki adamdyq demalys orny bir táýlikke 15 myń teńge. Biraq ol qyzmetke tek tańǵy as ǵana kiredi. Al Kólsaıdyń basyndaǵy qonaq úıde bir kún túnep shyǵý 8 myń teńge. Ol somaǵa ​ tańǵy as ǵana kiredi. Kólsaıdyń basynda​ qazaq úıdi de jalǵa alýǵa bolady. Baǵasy 25 myń teńgege deıin barady. Al dastarhan máziri úshin qosymsha tólem qajet.

Kólsaıda uıaly telefon joq, ınternet ustamaıdy, dala jaryqtandyrylmaǵan

«Kólsaı kólderi ulttyq tabıǵı parki 2007 jyly qurylǵan. Bul úlken merzim emes. Ulttyq park óziniń bas josparyna sáıkes damýda. Týrıster kóp kelgen saıyn baılanys júıesi qazir basty másele bolyp tur. «Qazaqtelekommen» jumystar atqarylýda. Internet, baılanys júıesi jospar boıynsha kelesi jyly tolyq oryndalady. Jaryqtandyrý máselesi de keler jyly iske asady dep josparlap otyrmyz», - dedi Kólsaı kólderi ulttyq tabıǵı parki týrızm bóliminiń bastyǵy ​ Hamıt ​ Ahmetov. ​ ​ ​

​Týrıster úsh Kólsaı kólin kórýge asyǵady.

​Demalýshylardyń kóbi úsh Kólsaı kóliniń bar ekenin bile bermeıdi. Kelýshilerdiń basym bóligi​ birinshi Kólsaıdyń kórkem tabıǵatyn kórip, sýretke túsip, taza aýasymen tynyǵyp, qaıyqpen serýendep qaıtady. Al birinshi Kólsaımen ekinshi Kólsaıdyń arasy ​ 8 shaqyrym. Ekinshi Kólsaı teńiz deńgeıinen 2250 metr bıiktikte ornalasqan. Ol jerge tek atpen nemese jaıaý júrip ǵana jete alasyz. Ný orman arqyly tas-tas, túrli kedergilerdi júrip ótý adamǵa keremetteı áser syılaıdy. ​

​Ekinshi Kólsaıǵa ásirese sheteldik týrısterdiń qyzyǵýshylyǵy basym

​Ekinshi Kólsaıǵa ásirese sheteldik týrıster kóptep barady. Osy jolǵy saparymyzda Germanııa, Italııa, Frantsııa, Reseıden kelgen birneshe sheteldikti jolyqtyrdyq. Olar arqalaryna shatyrlaryn, tamaqtaryn asynyp, ekinshi kólsaıǵa túneýge barady.​Ekinshi kólsaıda eshqandaı týrıstik servıs joq. Ol jaqta túnegińiz kelse mindetti túrde tamaq pen jyly kıim​ alý qajet. Sondaı-aq 8 shaqyrym joldy jaıaý júrgińiz kelmese atty jalǵa alýǵa bolady. Baryp-kelý quny 8 myń teńgeden joǵary.

​Týrıster neni eskerý kerek?

Kólsaı kólderi ​ ornalasqan Kegen aýdany Qyrǵystanmen shekaralas jatyr. Sondyqtan bul jerge kelgen ár bir demalýshy jeke kýáligin birge alyp júrýi qajet. Sebebi, demalys aýmaǵyna kiretin sátte ​ shekara qyzmetkerleri barlyq týrıstiń tól-qujatyn tekseredi. Eger ózimen bolmasa QR ÁK 510 babyna sáıkes 5 AEK aıyppul salynady. ​

​Kólsaıǵa kelýshilerdiń sany kúrt artqan

Kólsaı kólderi ulttyq parkiniń dırektory Ámirjan Malybekovtyń ​ aıtýynsha, Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasy jarııalanǵannan keıin Kólsaıǵa kelýshilerdiń sany kúrt asqan. Máselen, byltyr 41 myńnan asa týrıst Kólsaı kólin kórýge kelgen. Al 2007 jyldary demalýshylardyń sany 6-7 myńnan aspapty. Bıyl týrısterdiń​ sany eki ese kóbeıedi dep kútilýde.

​Kólsaıdyń keremetin kózben kórý kerek

Kólsaıdyń keremetin kózben kórý kerek. Osydan bir ǵasyrdan astam ýaqyt buryn jer silkinisi saldarynan paıda bolǵan bul kólderdiń kózdiń jaýyn alar sulýlyǵyna baı ósimdik jáne janýarlar álemin qosyńyz. Kólsaı kólderi ulttyq parkiniń aýmaǵynda ósimdiktiń 704 túri, janýarlardyń 226 túri jáne qustyń 197 túri kezdesedi. Sheteldikterdiń kórikti Kólsaıdy kórýge myńdaǵan shaqyrymdy artqa qaldyryp kelip jatqanda, týǵan jerińde osyndaı tumsa tabıǵattyń bar bolǵany úshin keýdeńdi maqtanysh sezimi kerneıdi. Eń bastysy osy bir saf altyndaı baǵa jetpes qundy dúnıemizdi saqtap qalyp, keler urpaqqa tabystaýymyz kerek degen oılar mazalamaı qoımaıdy. Kólsaı qazaq eliniń taǵy bir ulttyq brendi.

Aıta keteıik, BAQ quraldarynyń Kólsaı kóline saparyn Almaty oblystyq týrızm basqarmasy uıymdastyrdy.