Kólsaıda eki balasymen birge serýendep júrgen qar barysy kózge tústi

KÓLSAI. QazAqparat - «Kólsaı kólderi» ulttyq parkinde qar barysy fototuzaqqa túsip qaldy, dep habarlaıdy QazAqparat.

Ekologııa, geologııa jáne tabıǵı resýrstar mınıstrliginiń málimetinshe, «Kólsaı kólderi» ulttyq parkindegi fototuzaqqa taǵy da qar barysy túsken.

Vıdeodan eki kúshigimen birge serýendep júrgen ilbistiń analyǵyn kórýge bolady.

Buǵan deıin de saıabaqta ornalasqan fototuzaq «Qyzyl kitapqa» engen jyrtqyshty birneshe ret tirkegen edi.

Park aýmaǵynda tek 16 qar barysy bar. Janýarlardyń sany turaqty saqtalyp tur.

Esterińizge sala keteıik, qar barysy (Uncia uncia Schreber, 1775) Qazaqstannyń Qyzyl kitabyna engizilgen.

Bizdiń elde 120-130 qar barysy mekendeıdi, álemde 7 myńnan aspaıdy.

Fototuzaq - jyrtqyshtardyń sanyn esepke alý men baqylaýdyń zamanaýı ádisteriniń biri.