Kólsaıda aıý qonjyǵymen birge kameraǵa túsip qaldy
ASTANA. KAZINFORM — «Kólsaı kólderi» ulttyq parkinde aıý men qonjyǵynyń tabıǵı ortadaǵy kórinisi kameraǵa jazylyp alyndy. Sırek kezdesetin sát janýarlar dúnıesine baı qoryq aýmaǵyndaǵy Jymby saıynda tirkelgen.
«Kólsaı kólderi» memlekettik ulttyq tabıǵı parkiniń Kúrmeti ormanshylyǵy aýmaǵyndaǵy Jymby saıyndaǵy qorymnan ormanshy kómekshisi aıý men onyń qonjyǵyn baıqap, erekshe sátti beınetaspaǵa túsirip aldy.
— Tabıǵattyń tamasha kórinisi ulttyq park aýmaǵyndaǵy janýarlar dúnıesiniń baılyǵyn taǵy bir márte aıǵaqtaı tústi, — dep habarlady Orman sharýashylyǵy jáne janýarlar dúnıesi komıtetinen.
Aıta keteıik, buǵan deıin Ústirt memlekettik tabıǵı qoryǵynyń aǵa ǵylymı qyzmetkeri Qazaqstannyń Qyzyl kitabyna engen jyrtqysh ań — qaraqulaqty sýretke túsirip alǵan edi.
