Kólsaıda 15 mlrd teńgege 6 km aspaly jol salynady
QONAEV. KAZINFORM — Almaty oblysynyń eń kórikti oryndarynyń birinde aspaly jol salynady. Bul týraly óńirlik kommýnıkatsııalar qyzmetinde Kegen aýdanynyń ákimi Tańat Aıdarbekov aıtty.
Onyń sózinshe, Kólsaı kólderi ulttyq tabıǵı parkine bıyl 497 341 týrıst kelgen. 2025 jyldyń 12 aıynda munda 600 026 týrıst aıaldaǵan bolatyn. Al aýdandaǵy Kegen ótkizý beketinen Qyrǵyz Respýblıkasyna 2026 jyldyń basynan 164 800 adam ótken.
Brıfıngte Tańat Aıdarbekov Kólsaıdaǵy eki kóldi jalǵaıtyn aspaly jol salynǵaly jatqanyn atap ótti. Jobamen «Stroı Indýstrııa» JShS aınalyspaq.
— Kompanııa birinshi jáne ekinshi Kólsaı kólderin jalǵaıtyn, jalpy uzyndyǵy 6,3 shaqyrym bolatyn aspaly jol salýdy josparlap otyr. Jobanyń jalpy ınvestıtsııalyq quny — 15 mlrd teńge. 90 jańa jumys oryny ashylady. Qazirgi ýaqytta jobany memlekettik saraptamadan ótkizý úshin qajetti qujattar daıyndalyp jatyr, — dedi aýdan ákimi.
Kólsaıdaǵy aspaly jol eki bólikten quralatyn bolady: birinshi bóliginiń uzyndyǵy — 3,5 shaqyrym, ekinshi bóliginiń uzyndyǵy — 2,8 shaqyrym. Búginde jobalaý jumystary barysynda 43 tirek baǵanasyn ornatý oryndary belgilengen.
Sonymen qatar Kólsaı men Qaıyńdyǵa keletin demalýshylardyń yńǵaılyǵy úshin Saty aýylyndaǵy 1,5 gektar aýmaqta avtoturaq salynǵan. Joba bıýdjet qarajaty esebinen qarjylandyryldy, oǵan 394,3 mln teńge jumsaldy. Tańat Aıdarbekov qazir avtoturaqty 3 jyl merzimge senimgerlik basqarýǵa berý josparlanyp otyrǵanyn aıtty.
Eske salaıyq, buǵan deıin Qaıyńdy kóline aparatyn jańa jol qoldanysqa berilgenin jazǵanbyz.
Kegen aýdanynyń ákimi uzyndyǵy 10 shaqyrym bolatyn aýdandyq mańyzy bar avtojoldy kúrdeli jóndeýge 2,43 mlrd teńge jumsalǵanyn atap ótti.