Kólsaı men Sharynda ekologııalyq týrızmniń ilki jobasy júzege asady
QR Ekologııa, geologııa jáne tabıǵı resýrstar mınıstri Maǵzum Myrzaǵalıev pen Mádenıet jáne sport mınıstri Aqtoty Raıymqulova Kólsaı, Sharyn jáne Іle Alataýy aýmaǵynda ekologııalyq týrızmdi damytýǵa baǵyttalǵan birlesken jumys týraly kelisimge qol qoıý rásimine qatysty. Kelisim Kazakh Tourism ulttyq kompanııasy men «Sharyn», «Іle Alataýy», «Kólsaı kólderi» memlekettik tabıǵı parkteri arasynda jasaldy.
Kelisim boıynsha ekologııalyq týrızmdi damytýdyń jańa úlgisi áýeli osy úsh parkte júzege asyp, jaqsy nátıje berip jatsa, qalǵan 10 parkke de engizilmek. Sonyń arqasynda taraptar 2025 jylǵa eldegi ulttyq parkterge demalýǵa keletin týrıster sanyn 1,3 mln adamnan 3,4 mln-ǵa jetkizbekshi. Birlesken jobalar aıasynda 20 myń qosymsha jumys orny ashylyp, salaǵa 5-7 jyldyń ishinde 100 mlrd teńge ınvestıtsııa tartylmaq.
«Ekologııalyq týrızm boıynsha ulttyq tabıǵı parkterdiń áleýeti orasan. Olar erekshe kúzetiletin aýmaqqa jatady. Mundaǵy ekojúıeni saqtaı otyryp, ulttyq parkter aýmaǵyn ekologııalyq aǵartý, ǵylymı, týrıstik, rekreaktsııalyq, shekteýli sharýashylyq maqsattarǵa paıdalaný isin retteý – basty mindettiń biri. Elimizde 13 ulttyq tabıǵı park bolsa, búgin sol nysandardyń jańa tarıhy bastaldy dep aıtýǵa tolyq negiz bar», - dedi QR Ekologııa, geologııa jáne tabıǵı resýrstar mınıstri Maǵzum Myrzaǵalıev.
Mádenıet jáne sport mınıstri Aqtoty Raıymqulova kelisimniń týrızmdi turaqty damytýǵa jol ashatynyn atap ótti.
«Birlesken jobalar atalmysh úsh park aýmaǵynda týrızmdi turaqty damytýǵa álemdik úzdik tájirıbelerdi qoldaný arqyly basqarýdyń jańa modelin usynǵaly otyr. Bul model nátıjeli iske asqan jaǵdaıda el aýmaǵyndaǵy basqa ulttyq saıabaqtarǵa engiziledi», - dedi Aqtoty Raıymqulova.
