Kólsaı men Qaıyńdyǵa aparatyn jol qashan jóndelip bitedi
KEGEN. KAZINFORM - Kegen aýdanynda Saty aýylynan Qaıyńdy kóline deıingi uzyndyǵy 10 shaqyrymǵa jýyq joldyń qurylysy jalǵasyp jatyr. Jobanyń jalpy quny shamamen 2,5 mlrd teńge. Baspasóz týrynda tilshilerimiz jumys barysymen tanysty.
Jańa joldyń qurylysy birshama ýaqyt talqylandy. Degenmen 2023 jyldyń kúzinde Qaıyńdy - Saty taýly jolynda bolǵan avtobýs pen ÝAZ soqtyǵysynan keıin jol-kólik jaıly jobaǵa belsendi nazar aýdy. Sol kezde qurylystyń 2024 jyly salynatyny aıtylǵanymen, jobanyń bastalý merzimi birneshe ret keıinge shegerildi.
Týrıster buralań taý jolynda jol talǵamaıtyn kóliktermen kólge deıin jetip, qalǵan joldy jaıaý júrip ótetin. Búginde jaǵdaı jaqsardy: jol asfalt tóseýge daıyn. Ol keńeıtilip, tegistelgen jáne syrtyn jabýǵa arnalǵan negizi de daıyndalǵan.
«Kólsaı kólderi» MUTP dırektorynyń orynbasary Hamıt Ahmetovtyń málimdeýinshe, negizgi daıyndyq jumystary aıaqtaldy. Nysanda úsh iri kópir salynyp, sý ótkizgish qubyrlar tóseldi, sondaı-aq joldy tegisteý men nyǵyzdaý jumystary júrgizildi. Jýyrda asfalt tóseý jumystary bastalady.
– Jospar boıynsha jol qurylysy 2026 jyldyń tamyz aıynda aıaqtalýy tıis. Onyń jalpy uzyndyǵy shamamen 10 shaqyrym,- dep atap ótti Hamıt Ahmetov.
Jańa jol Qaıyńdy kólinen 1,5 shaqyrym jerde, 60-100 kólikke arnalǵan turaq aımaǵynda qurylady. Jolaýshylar qalǵan joldy jaıaý nemese atpen júrip ótedi. Budan bólek, transport úshin arnaıy ótkel qarastyrylǵan. Ol múmkindigi shekteýli jandardy kólge deıin jetkizý maqsatynda aqyly jumys isteıdi.
Jol paıdalanýǵa berilgennen keıin kireberiske shlagbaým ornatylady. Jańa jolmen júrgen jolaýshydan qosymsha aqy alynbaıdy. Týrıster úshin ulttyq park pen Kólsaı kólderine barýdyń biryńǵaı tarıfiniń saqtalýy da josparlanǵan. Búginde aýmaqqa kirý quny avtokóliktiń sanatyna baılanysty 2,5 myń teńgeden bastalady. Sondyqtan tólem jolaýshylar sany arqyly emes, kólik quralymen esepteledi.
Hamıt Ahmetov týrısterdi kólge deıin jetkizip júrgen eski ÝAZ avtokólikterin paıdalaný taqyrybyn da atap ótti. Onyń aıtýynsha, kóptegen mashına shynymen de jańarýdy qajet etedi. Sol úshin jańa jol qoldanysqa berilgennen keıin qyzmet kórsetý sapasynyń talaby arta túsedi.
– Kólik ıeleri qazirdiń ózinde kólikterin modernızatsııalaý týraly oılap jatyr. Degenmen keı týrıster úshin mundaı jol talǵamaıtyn kóliktermen júrý de qyzyqty, árkimniń talǵamy ártúrli deıdi ǵoı,- dep habarlady ol.
Ulttyq park ókiliniń málimdeýinshe, munda jyl saıyn týrıstik qyzmet kórsetetin júrgizýshiler jáne at ıelerimen profılaktıkalyq is-sharalar ótkizilip turady. Park ákimshiligi ınfraqurylymnyń damýymen birge qyzmet kórsetý sapasy, sondaı-aq qaýipsizdik deńgeıi de birtindep artady dep úmittenip otyr.
Eske sala keteıik, buǵan deıin biz jobanyń júzege asyrylý barysyn egjeı-tegjeıli jazǵan bolatynbyz.
Qaıyńdy kóline aparatyn jol kúzde paıdalanýǵa beriledi.
Aıaýlym Qanatqyzy
