Kólsaı mańynda týrıster mingen kólik aýdarylyp, bir adam qaıtys boldy

QONAEV. KAZINFORM — Almaty oblysynda jol apatynan bir adam jan tapsyrdy.

Almaty oblysy polıtsııa departamentiniń málimetinshe, jol-kólik oqıǵasy Kegen aýdanyndaǵy Qaıyńdy–Saty avtojolynyń 4-shaqyrymynda bolǵan. Toyota Sequoia avtokóliginiń júrgizýshisi rólge ıe bola almaı, kólik jol jıegine shyǵyp, aýdarylyp ketken.

Jelidegi málimetke sáıkes, kóliktiń ishinde sheteldik týrıster otyrǵan.

— Jol-kólik oqıǵasy saldarynan bir jolaýshy oqıǵa ornynda qaza tapty. Taǵy bes jolaýshy túrli jaraqattarymen aýdandyq aýrýhanaǵa jetkizildi, — dep habarlady departamentten.

Polıtsııa jol-kólik oqıǵasy deregi boıynsha qylmystyq isti tirkep, oqıǵanyń mán-jaıyn anyqtaý úshin tergeý jumystaryn júrgizip jatyr. Kólik júrgizýshi ýaqytsha ustaý ızolıatoryna qamaýǵa alyndy.

Eske salaıyq, keshe Almaty — Bishkek tasjolynda kólik apatynan jeti adam qaza tapty. Polıtsııa málimetinshe, Honda Odissei avtokóliginiń júrgizýshisi alda qozǵalyp bara jatqan HOWO júk kóliginiń tirkemesine soqtyǵysqan. Tártip saqshylary qazir bul derek boıynsha qylmystyq isti tergep jatyr.

Jol apatynda qaza tapqan 5 jolaýshy sport ardageri bolǵan.