Kólsaı mańynda qaptaǵan meımanhana men kıiz úıler: olardyń qurylysy zańdy ma
QONAEV. KAZINFORM — «Kólsaı kólderi» ulttyq tabıǵı parki — Qazaqstandaǵy eń kórikti jerlerdiń biri. Bul óńirge jyl saıyn myńdaǵan týrıst at basyn burady. Týrıster sany artqan saıyn qonaq úı, kıiz úı men demalys oryndarynyń sany da kóbeıip jatyr. Alaıda olardyń salynýy qanshalyqty zańdy jáne sanıtarlyq-ekologııalyq talaptarǵa saı ma? Bul saýaldarǵa Kazinform tilshisi jaýap izdep kórdi.
Qurylystyń zańdylyǵy
«Kólsaı kólderi» ulttyq parkine bara jatqan jolda týrıster aldymen Saty aýyly men park shekarasy arasyndaǵy jol boıyna ornalasqan kóptegen qonaq úı, kapsýlalyq qonaqjaılardy, kıiz úılerdi kóredi. Bul nysandardyń basym bóligi retsiz salynǵan jáne kóptegen týrıst «osy qurylystar zańdy ma, tabıǵatty qorǵaý zańnamasyn buzbaı ma?» degen zańdy suraq qoıady.
Jergilikti turǵyndardyń aıtýynsha, keıbir týrıstik nysandar sharýa qojalyǵyna arnalǵan jerlerde boı kóterýi múmkin, al ondaı ýchaskelerde qurylys júrgizýge tyıym salynǵan. Bul máseleni naqtylaý úshin Kazinform agenttigi Almaty oblysynyń ákimdigine resmı saýal joldady.
Kegen aýdany ákimdigi usynǵan resmı jaýapqa sáıkes, keıbir nysandar shynymen de zań buzýshylyqpen — aýyl sharýashylyǵy jerlerinde salynǵan. Mundaı nysandarǵa qatysty QR Ákimshilik quqyq buzýshylyqtar kodeksiniń 136-baby negizinde sharalar qabyldanyp jatyr.
Sonymen qatar, 2024 jyldan bastap óńirdi damytýǵa arnalǵan bas jospar ázirlenip jatyr. Onyń aıasynda jerlerdiń maqsatty paıdalaný túrin ózgertý, biryńǵaı sáýlettik kelbetti qalyptastyrý jáne qurylys jumystaryn QR «Sáýlet, qala qurylysy jáne qurylys qyzmeti týraly» zańynyń talaptaryna saı retke keltirý kózdelgen.
Sanıtarlyq jáne ekologııalyq talaptar
Týrısterdi alańdatatyn taǵy bir másele — týrıstik ınfraqurylym nysandarynda sanıtarlyq jáne ekologııalyq normalardyń saqtalýy, ásirese qoqys jınaý jáne ony joıý problemasy.
Ákimdiktiń málimdeýinshe, barlyq nysan QR Ekologııalyq kodeksi men «Halyqtyń sanıtarııalyq-epıdemıologııalyq salamattylyǵy týraly» Zań talaptaryna saı jumys isteýi tıis.
— Ulttyq parktiń baqylaý pýnktinen 600 metr qashyqtyqta arnaıy qoqys polıgony jabdyqtalǵan, — dedi ákimdik ókilderi.
Taǵy bir mańyzdy másele — ıesiz qalǵan nysandar men qurylys aıaqtalǵannan keıin jınalmaı qalǵan qoqys. Keıbir ýchaskelerde qurylys materıaldary men qaldyqtar sol kúıi qalǵan.
Ákimdik ókilderi QR Ekologııalyq kodeksiniń 99-babyna sáıkes, nysan ıesi qyzmetin toqtatqan jaǵdaıda jerdi bastapqy qalpyna keltirip, tazalaý — rekýltıvatsııa jumystaryn júrgizýge mindetti ekenin eske saldy.
Ruqsatty kim beredi
Qurylysqa ruqsat berý jáne paıdalanýǵa engizý QR «Sáýlet, qala qurylysy jáne qurylys qyzmeti týraly» Zańynyń 19-baby negizinde júzege asyrylady. Ol úshin jobalyq-smetalyq qujattama, eskızdik jobany kelisý jáne qurylysqa ruqsat qajet. Eger nysan qorǵaý aımaǵynda ornalasqan bolsa, ýákiletti ekologııa basqarmasynan qosymsha kelisim de talap etiledi.
Qansha nysan tirkelgen
Kegen aýdanynan atap ótkendeı, ulttyq parktyń býferlik aımaǵynda resmı tirkelgen 58 týrıstik nysan bar. Naqty málimetterdi ekologııa departamenti men park ákimshiligi qosymsha jınaqtap jatyr.
Aıta keteıik, ótken jyly «Kólsaı kólderi» ulttyq parkine 395 myńnan astam týrıst kelgen.
Buǵan deıin redaktsııamyz Kólsaıdyń biregeı tabıǵatyna týrıstik aǵynnyń kóbeıýi qalaı áser etýi múmkin ekendigi týraly maqala jarııalaǵan bolatyn. Mamandar tabıǵatty keler urpaqqa saqtaý úshin der kezinde tıisti sharalar qabyldaýdyń mańyzyn atap ótken edi.
Osyǵan deıin Almaty oblysynda ornalasqan tanymal týrıstik aýylda jer daýy týyndaǵan edi.
Eske salaıyq, 2023 jyly Almaty oblysynyń Saty aýyly halyqaralyq deńgeıde eń úzdik týrıstik aýyl retinde tanylyp, bedeldi «Best Tourism Villages by UNWTO» syılyǵymen marapattaldy.
Sondaı-aq týrısterdiń qaýipsizdigin kúsheıtý maqsatynda qandaı jobalar qolǵa alynǵany týraly jazǵan edik.