Kólsaı kólderine benzınmen júretin kólikter kirgizilmeıdi – ákim

Eldegi 68 týrıstik orynnyń 11-i Almaty oblysynda ornalasqan. Bul týraly óńir ákimi Marat Sultanǵazıev «Jibek Joly» telearnasyndaǵy «Ýáde» baǵdarlamasynda aıtty, dep habarlaıdy Kazinform.

«Bizdiń oblystyń týrıstik áleýeti óte joǵary. Eger respýblıkada 68 týrıstik destınatsııa bolsa, 11-i bizdiń oblysta ornalasqan. Eń tanymaly – Kólsaı, ony bári biledi. Sol Kólsaıda kádimgi adam qydyratyn trotýarlar jasaýdy bastadyq», - dedi óńir basshysy.

Baǵdarlamada Kólsaı kólderine jylyna 1 mıllıonǵa jýyq týrıst keletini aıtyldy. Byltyr oblys ákimi Kólsaıdaǵy avtoturaq kólge tym jaqyn ornalasqanyn, jaıaý júrginshiler jolynyń nashar ekenin aıtqan edi. Sondaı-aq, benzınmen júretin kólikterdi Saty aýylynda qaldyryp, Kólsaıǵa tek elektromobılder men gazben júretin kólikterdi ǵana ótkizýdi usynǵan.

«Qazirgi ýaqytta mashınalar turaǵyn tómen jaqqa túsirý úshin jer belgilendi. Jańa avtoturaq qurylysy kelesi jyly bastalady. Sosyn káriz júıesi boıynsha jobalyq-smetalyq qujattama jasaýdy bastadyq. Óıtkeni ol jaqqa káriz júıesi salmasa, bolmaıdy. Negizinde bir ınvestor taýyp, tolyq sonyń esebinen sheship alý yńǵaıly bolar edi. Bul jumystardy qosymsha júrgizýdemiz. Birneshe kompanııa Kólsaıǵa baryp, qyzyǵýshylyq tanytyp ketti. Óıtkeni onda kúnine 3-4 myń týrıst barady jáne bul san áli de arta túsedi», - dedi Marat Sultanǵazıev.