Kólsaı kólderinde 31 mamyrǵa deıin balyq aýlaýǵa tyıym salyndy
QONAEV. KAZINFORM — Almaty oblysynda ornalasqan ulttyq tabıǵı parki aýmaǵynda 3 aı balyq aýlaýǵa bolmaıdy.
«Kólsaı kólderi» memlekettik ulttyq tabıǵı parkiniń baspasóz qyzmeti tyıym Qazaq balyq sharýashylyǵy ǵylymı-zertteý ınstıtýty 2025 jyly jasaǵan bıologııalyq negizdemege sáıkes kúshine enetinin habarlady.
— 2026 jyldyń 1 naýryzynan 31 mamyryna deıin Ortańǵy Kólsaı, Tómengi Kólsaı, Qaıyńdy kólderinde jáne park aýmaǵyndaǵy barlyq ózen sýlarynda áýesqoılyq jáne sporttyq maqsatta balyq aýlaýǵa tyıym salyndy, — delingen habarlamada.
Eske salaıyq, buǵan deıin Balqashta 100 keliden astam zańsyz balyq aýlaǵan tórt adam ustaldy. Olarǵa QR QK-niń 335-babynyń belgileri boıynsha qylmystyq is qozǵaldy.
Al Almatyda zańsyz aýlanǵan 700 keli balyq anyqtaldy. Aldyn ala baǵalaý boıynsha balyq resýrstaryna 5 946 348 teńge zalal keltirilgen.