Kólsaı kólderinen medýza tabyldy
ALMATY. QazAqparat - QR AShM Orman sharýashylyǵy men janýarlar álemi komıtetiniń baspasóz hatshysy Sáken Dildahmet Facebook paraqshasynda Kólsaı kólderinen medýza tabylǵanyn jarııalady, dep habarlaıdy QazAqparat tilshisi.
Onyń aıtýynsha, erekshe kúzetiletin terrıtorııalarda «Balyq sharýashylyǵy ǵylymı-óndiristik ortalyǵy» JShS mamandary Orta jáne Tómen Kólsaıdaǵy faýnany 2016-2019 jyl aralyǵynda zerttep keledi.
Atap aıtqanda, gıdrobıologııa men gıdroanalıtıka zerthanasynyń qyzmetkerleri kól túbindegi mıkroorganızmderdi baqylaýǵa alǵan.
«Orta Kólsaı sýynan tuşy sýda ómir súretin medýza tabylǵanda tań qaldyq. Bizdiń sý qoımalarynda bul jándikter óte sırek kezdesedi. Alaıda sońǵy jyldary tuşy sýda ómir súretin jylý súıgish medýzalardyń barlyǵy jıi aıtylyp keledi. Bundaı tirshilik ıesi Shymkent janyndaǵy Toǵyz kólinen de tabylǵan», - dedi Sáken Dildahmet.
Mamandardyń pikirinshe, Limnocnida tanganyicae jáne Craspedacusta sowerbii medýzalarynyń sýda paıda bolýyna sý temperatýrasynyń jaılylyǵy yqpal etedi.
«Kólsaıda jazda sý temperatýrasy 15-16 gradýstan aspaıdy. Bul medýzalar úshin eń shekti temperatýra bolyp tabylady. Olardyń Kólsaı kólderine qalaı túskeni belgisiz. Bul medýzany kólge týrısterdiń biri alyp kelgen bolar. Nemese bir qus ákelgen bolar. Tómengi temperatýrada medýzalardyń kóbeıýi aqylǵa syımaıdy. Sebebi, Kólsaı kólderinen medýzalar qaıtalap tabylyp jatqan joq», - dedi ol.
Alaıda mamandar osy erekshe kúzetiletin aımaqtyń faýnasyn barynsha baqylaýǵa alý kerektigin eskertedi.
