Koloradoda marıhýana qosqan kámpıt óndirýshini sotqa berdi
ASTANA. QazAqparat - Soltústik Amerıkadaǵy shokolad ónimderin shyǵaratyn iri óndirýshi Hershey kompanııasy Koloradodaǵy marıhýana qosylǵan kámpıt shyǵaratyn fırmany sotqa berdi, dep habarlady Lenta.ru.
Taýar belgisi quqyǵy buzylǵany týraly talap-shaǵymǵa Hershey shyǵaratyn ónimge óte uqsas Tincture Belle jáne Tincture Belle Marijuanka atty táttilerdiń 4 túri sebep boldy.
Marıhýana qosylǵan kámpıtter Koloradoda arnaıy oryndar men dárihanalarda satylady. Hershey, Tincture Belle kámpıtteriniń uqsas oramdary tutynýshylardy, sonyń ishinde balalardy shatastyrýy múmkin dep sanaıdy. Soǵan baılanysty Hershey sottan «kóshirilgen» táttilerdi satýdy toqtattyrýdy, sondaı-aq keltirilgen zalaldy toltyrýdy talap etedi, biraq onyń kólemi naqtylanbaǵan.
Koloradoda zań shyǵarýshylar qazir kádimgi kámpıtter men keksterdi shatastyrýǵa bolatyn marıhýana qosylǵan ónimderdiń aıyrym belgilerine qatysty erejelerdi qatańdatý múmkindigin qarastyrýda.
Marıhýanany yryqtandyrýdy synaýshylar marıhýana qosylǵan ónimderdi shamadan tys paıdalaný ólimge ákelip soǵatynyn aıtýda. Máselen, naýryz aıynda marıhýana qosylǵan pecheneni kóbirek jep qoıǵan stýdent qonaqúıdiń balkonynan sekirip ketken. Al sáýir aıynda bir áıel qutqarý qyzmetine qońyraý soǵyp, onyń kúıeýi qarasora qosylǵan kámpıt pen aýrýdy basatyn tabletkalardy iship alyp, aqyrzaman bolatyny jóninde sandyraqtap, ózin atyp óltirmekshi bolǵanyn aıtyp shaǵymdanǵan.
Degenmen esirtkini yryqtandyrýdy jaqtaýshylar alkogoldi shamadan tys ishý de osyndaı oqıǵalarǵa ákep soǵatynyn aıtyp, esirtki qosylǵan ónimderge múldem tyıym salǵannan góri ony retteý sharalaryn qatańdatý jóninde ýáj aıtady.
Kolorado marıhýanany medıtsınalyq maqsatqa ǵana emes, ósirýge, satýǵa jáne paıdalanýǵa bolatyn alǵashqy amerıkandyq shtat boldy. 1 qańtardan bastap qarasora búkil shtattyń 30 dúkeninde keńinen satyla bastady.
