Koloradoda Izraıldi qoldaǵan beıbit sherýge shabýyl jasaldy

ASTANA. KAZINFORM — Kolorado shtatynyń Boýlder qalasynda ızraıldik tutqyndardy bosatýdy talap etken sherýge shabýyl jasaǵan er adam «Palestınaǵa bostandyq berilsin» dep aıǵaılaǵan, dep habarlaıdy NBC News. 

Kýágerlerdiń aıtýynsha, shabýylshy jumysshy kıimimen jasyryn kirip, janǵysh suıyqtyq quıylǵan bótelkeni bulǵap, aıqaılaǵan. Bul aqparatty sheneýnikter tekserip jatyr.

Shabýyl jasaǵan er adam oqıǵa ornynda ustaldy. Ol El-Paso okrýginde turatyn Mysyr azamaty 45 jastaǵy Mohamed Sabrı Solıman ekeni anyqtaldy. Bılik ustalǵan azamat jalǵyz áreket etkenin aıtyp, buǵan deıin eshqandaı zańbuzýshylyq jasamaǵan dep esepteıdi.

67 men 88 jas aralyǵyndaǵy segiz adam kúıik shalǵan, bılik málimetinshe, olardyń jaǵdaıy óte aýyr dep baǵalanyp otyr. Lańkestik áreket retinde qarastyrylǵan shabýylǵa qatysty tergeý amaldary júrip jatyr.

Buǵan deıin Vashıngtonda Izraıl elshiliginiń eki qyzmetkeri oqqa ushqanyn jazǵan bolatynbyz.