Kolonııadan – eńbek naryǵyna: Qaraǵandyda 180 sottalǵan kásip meńgerýdi bastady
QARAǴANDY. KAZINFORM – Qaraǵandy oblysyndaǵy qylmystyq-atqarý júıesiniń bes mekemesinde jumysshy mamandyqtary boıynsha oqý bastaldy. Bıyl sottalǵandar eńbek naryǵynda suranysqa ıe alty mamandyqtyń birin meńgere alady, dep habarlaıdy Kazinform tilshisi.
Óńirdegi QAJ mekemelerinde 180 sottalǵan jańa oqý jylyn bastady. Sabaq bes mekemede ótip jatyr, oqý úderisin eki tehnıkalyq jáne kásiptik bilim berý kolledji uıymdastyrǵan.
Bilim alýshylar alty jumysshy mamandyǵyn meńgerip jatyr. Olar – avtoslesar, elektrgazben dánekerleýshi, avtomobıl jóndeý slesari, qurylys árleý jumystarynyń sheberi, tiginshi jáne avtokólik jóndeý sheberi.
Oqý baǵdarlamasy teorııalyq sabaqtarmen qatar praktıkalyq daıyndyqty da qamtıdy. Sottalǵandar alǵan daǵdylaryn bostandyqqa shyqqannan keıin jumysqa ornalasý kezinde paıdalana alady.
Mamandyqtardy tańdaýda eńbek naryǵyndaǵy jumysshy kadrlarǵa degen suranys eskeriledi. QAJ mekemeleri sottalǵandardy keıinnen jumysqa ornalastyrý máselesi boıynsha kásiporyndarmen de jumysty jalǵastyryp jatyr.
Aıta keteıik, buǵan deıin Qazaqstandaǵy qylmystyq-atqarý júıesi mekemelerinde sottalǵandar 48 mamandyq boıynsha bilim alatyny habarlanǵan.
