Kolonııada jazasyn ótep jatqan qyz-kelinshekterge meıram kúni fotosessııa jasaldy
ASTANA. QazAqparat - PENAL REFORM INTERNATIONAL (PRI) Halyqaralyq túrme reformasynyń Ortalyq Azııadaǵy ókildiginiń qyzmetkerleri «Qazaqstandaǵy balalar men áıelderge arnalǵan túzeý mekemelerindegi medıtsınalyq jáne áleýmettik qyzmetti kúsheıtý» jobasynyń aıasynda Atyraý qalasyndaǵy áıelder kolonııasynda jazasyn ótep jatqan qyz-kelinshekterdi 8 naýryz Halyqaralyq áıelder kúnimen quttyqtap, birqatar syılyqtar jasady.
Qazirgi tańda elimizdegi 6 áıelder kolonııasynda 3014 áıel jazalaryn ótep jatyr. Atyraýdaǵy kolonııada 252 áıel bar. Meıram qarsańynda elimizdiń batys óńirindegi jalǵyz kolonııada relaksatsııa bólmesi, sán bólmesi men sportpen jáne ıogamen aınalysý zaly ashyldy. Atalǵan bólmelerdiń qyz-kelinshekter úshin mańyzy zor ekeni anyq. PRI uıymynyń zertteý málimetinshe sottalǵan áıelderdiń jartysynan kóbi osyndaı psıhologııalyq kómekke zárý.
Sán bólmesi estetıkalyq sulýlyqty saqtap qana qoımaı, mundaǵy áıelder qaýymyna shashtaraz mamandyǵyn ıgerip, jazasyn ótep shyqqan soń, jumysqa turýlaryna múmkindik beredi.
Sondaı-aq, bul kúni áıelder otrıadynyń arasynda sýret saıysy uıymdastyrylyp, komıssııa jeńimpazdarǵa syılyqtardy tabys etedi. Týǵan-týystarymen kezdesý uıymdastyryldy.
Meıram kúni kolonııadaǵy qyz-kelinshekterge fotosessııa jasaldy. Sebebi sottalǵan áıelderdiń týystarymen baılanysy hat arqyly júzege asyp, sýretteri úılerine jiberiletin bolady.
Halyqaralyq túrme reformasynyń Ortalyq Azııadaǵy ókildiginiń málimetinshe 2013-2014 jyldary álem boıynsha sottalǵandardyń 2-9 paıyzyn áıelder quraıdy. Er adamdarǵa qarastyrylǵan kolonııalarda qyz-kelinshekterge qajetti jaǵdaılar qarastyrylmaǵan. QR ІІM QAJK dereginshe jyl basynda 2975 áıel jazasyn ótep, ótken jylǵa qaraǵanda 400 adamǵa azaıǵan.
Penal Reform International Halyqaralyq uıymynyń Ortalyq Azııadaǵy ókildiginiń aımaqtyq dırektory Azamat Shambılov: - «Zertteý barysynda belgili bolǵandaı sottalǵan áıelderdiń kóbisi birinshi ret qylmys jasaǵan. Jasy 30 deıingiler 20%, 30-50 arasyndaǵylardyń úles salmaǵy 59% qurasa, sottalǵan bes áıeldiń bireýiniń jasy 50-den asqan. PRI jobasy balalary kámeletke jasqa tolmaı turyp, sottalǵan áıelderge qoldaý kórsetedi. Olarǵa arnap munda oıyn alańdary men balalarymen kezdesý bólmesi qarastyrylǵan. Eń basty aıta ketetin jaıt - áıelder kolonııasynda BUU Halyqaralyq talaptaryna saı (Bangkok Erejesi) arnaıy oqýdan ótken áıelder qyzmet etedi. Atalǵan is-sharalar jazasyn ótep jatqan názik jandylardy qoǵam qajet ekendikterin bir sátte esterinen shyǵarmaı, áleýmettik turǵydan qoldaý taýyp, qoǵamymyzǵa qaıta oralýlaryna sep bolary sózsiz» dep óz pikirin bildirdi.
