Kolonııa men túrme qyzmetkerleriniń jalaqysy ósedi
NUR-SULTAN. QazAqparat – Elimizdiń qylmystyq atqarý júıesi qyzmetkerleriniń jalaqysyn kóterý josparlanyp otyr. Bul týraly búgin Senat depýtattarynyń ishki ister organdaryn jańǵyrtý máseleleri jónindegi kóshpeli otyrysynda QR Іshki ister mınıstriniń orynbasary Alekseı Kalaıchıdı aıtty, dep habarlaıdy QazAqparat tilshisi.
Kóshpeli otyrys barysynda mınıstr orynbasary qylmystyq atqarý júıesi qyzmetkerleriniń jalaqysyn kóterýge baǵyttalǵan jumystardyń júrgizilip jatqanyn aıtty.
«Qylmystyq atqarý júıesi qyzmetkerleriniń jalaqysy kóteriledi. Jedel qyzmetkerlerdiń jalaqysy - 25, al qalǵan qyzmetkerlerdiń jalaqysy - 20 paıyzǵa artady. Bul jumys jalǵasyp jatyr», - dedi ol.
Sonymen qatar «aprobatsııa merziminde esepte turǵan quqyq buzýshylardyń» táýekelin baǵalaý tetigin engizý máselesine de toqtaldy.
«Biz eki forým ótkizip, vedomstvoaralyq úlken jumys tobyn qurdyq jáne qazirgi ýaqytta sol jaqta jumys istep jatyrmyz. Bul jumys tobynda kóterilgen usynystar tek qana bizdiń polıtsııa qyzmetkerleri tarapynan ǵana bolmaýy úshin jasalyp jatyr. Salalyq sarapshylar qaýymdastyǵy tarapynan da barynsha tolyqtyrýlar bolǵanyn qalaımyz. Aprobatsııa qyzmetiniń psıhologyn jetkizýge qatysty aıtar bolsaq, 44 psıholog engizildi. Bul jumys jalǵasyp jatyr», - dedi Alekseı Kalaıchıdı.
