Kolonııa qyzmetkerleri Qostanaıda turǵyndardy órtten aman alyp qaldy
QOSTANAI. QazAqparat – Kolonııa qyzmetkerleri Qostanaıda turǵyndardy órtten aman alyp qaldy, dep habarlaıdy QazAqparat QR ІІM Qylmystyq atqarý júıesi komıtetiniń baspasóz qyzmetine silteme jasap.
Baspasóz málimetterine qaraǵanda, Qostanaı qalasynda ornalasqan qatań rejımdegi kolonııa qyzmetkerleri qylmystyq-atqarý júıesi mekemesiniń aýmaǵyna irgeles jatqan ýchaskelerdi tekserý barysynda janynda ornlasqan úılerdiń birinen tútin men ottyń tutanyp jatqanyn baıqaıdy.
Birneshe mınýttan keıin ofıtserler órttiń izi baıqalǵan úıge qaraı júgirip, bolǵan jaǵdaı týraly mekemeniń kezekshi bólimine habarlaıdy. Olar barǵan boıda turmystyq ǵımarattardy órt shalyp, kórshi aýlaǵa qaraı shyqqannyn kóredi.
Qyzmetkerlerdiń aıtýynsha, oılanýǵa ýaqyt bolmaǵan, sebebi janǵan órttiń saldarynan úıdiń biraz aýmaǵyn jalyn sharpyp, qaýip barǵan saıyn údeı túsken. Olar tez arada úıdiń qorshaýyn buzyp, kórshilerdi oıatady.
Órt qaýpi tóngen ýaqytta egde jastaǵy úı ıesimen birge kórshi páterde de jas otbasy bolǵan. Ádilet aǵa leıtenanty Ǵalıbek Tolepbergen men ádilet leıtenanty Darhan Bekdaýtov órt sóndirý qyzmetiniń kelgenin kútip, artynsha jumys oryndaryna oralady.
Turǵyndar QAJ mekemesiniń qyzmetkerlerine tótenshe jaǵdaı kezinde kórsetken jedel ári ýaqytyly kómekteri úshin alǵysyn bildirdi.
