Qolóner sheberlerine arnalǵan grant baǵdarlamasyna ótinim qabyldaý jalǵasyp jatyr
ASTANA.KAZINFORM — Elimizde qolóner sheberlerine arnalǵan grant baǵdarlamasyna ótinim qabyldaý jalǵasyp jatyr. Bul týraly Mádenıet jáne aqparat mınıstrligi habarlady.
Kreatıvti ındýstrııalardy damytý qory dástúrli qolóner men ulttyq ónerdi saqtaý, damytý jáne sheberlerdiń shyǵarmashylyq bastamalaryn qoldaýǵa baǵyttalǵan «Halyq qolóneri jáne beıneleý óneri mektebi» jobasyn bastaǵan edi. Joba aıasynda qolóner sheberlerine 5 mıllıon teńgege deıin grant bólinedi.
Granttar ulttyq qolónerdiń sırek kezdesetin ári umytylyp bara jatqan túrlerin meńgergen sheberlerge beriledi. Joba ulttyq ónerdiń tamyryn úzbeı, sheberlerdiń tájirıbesin jas býynǵa dáripteýdi jáne kreatıvti ındýstrııanyń damýyna jol ashatyn shyǵarmashylyq orta qalyptastyrýdy kózdeıdi.
Grant ıegerleri atanǵandar arnaıy bilim berý baǵdarlamalaryna qatysý múmkindigine ıe bolady. Baǵdarlama sheńberinde olar oqýshylar men jastarǵa arnap sheberlik saǵattary men tájirıbelik sabaqtar ótkizedi.
Ótinim 2026 jylǵy 31 mamyrǵa deıin elektrondy formatta qabyldanady. Ol úshin silteme arqyly ótip, portfolıo usyný qajet. Qatysýshylar portfolıony Instagram paraqshasyna silteme, beınetanystyrylym, PDF-prezentatsııa, daıyn jumystardyń fotosýretteri nemese júzege asqan jobalar tizimi formatynda usyna alady.
Qyzylorda oblysy Shıeli aýdanynyń turǵyny Medeý Berdimurat atadan qalǵan asyl mura — qolónerdi zaman talabyna saı jańǵyrtyp júrgenin jazǵan edik.
